El futuru del carbón, a debate en Mieres

El futuru del carbón n'Asturies va debatise a primeros del mes qu'entra en Mieres, onde'l Club Español de la Energía, la Conseyería d'Industriava y la Fundación Asturiana de la Enerxía van facer unes xornaes sobre'l carbón tres del tratáu de la CECA, que a lo llargo de 40 años mandó la política europea sobre esta fonte d'enerxía y que ta pa estinguise como documentu marcu de referencia. Les xornaes que se presentaron ayeri van facese en Campus de Mieres los díes 10 y 11 de xunu, van tratar tanto de les nueves polítiques europees y normatives mediuambientales alredor del carbón fósil como de les nueves tecnoloxíes d'aprovechamientu d'esta fonte d'enerxía nes centrales térmiques.

Y ello ye que'l mayor atractivu de les xornaes va tar en que Unión Fenosa y Hidrocantábrico van aprovechar el marcu de les conferencies pa presentar los sos planes estratéxicos pa d'equí a dellos años. De va tiempu vien falándose d'estos planes, qu'inclúin la construcción de dos grandes centrales térmiques nueves, una n'Aboño (Xixón) baxo titularidá d'HC y la otra en Cangas del Narcea, remanada por Unión Fenosa, anque sobre esta lleva tiempu especulándose con si va ser a gas o a carbón