El fútbol resquiebra Uviéu

La crisis de resultaos y la económica empozaron al
históricu Real Uviéu SAD na tercera división, un descensu
que venía cociendo tol añu, con avisos como los cortes de
corriente nes instalaciones de El Requexón pero que nun fizo saltar les
alarmes hasta que los notarios nun certificaron el desastre.



Ello ye que, en conociéndose'l descensu a tercera, l'alcalde
Gabino de lorenzo aprovechó pa intentar facer realidá una
ambición de vieyo, la de rematar a la directiva del Real Uviéu, que nunca
nun foi de la mesma cuerda política que l'alcalde popular.
Sicasí, y anque la situación yera desesperada, los titulares del
Real Uviéu nun quixeron aceptar la ufierta del Ayuntamientu pa refundar
l'equipu partiendo del modestu Astur CF, colo qu'agora Uviéu va tener
nesta lliga dos equipos "oficiales" en tercera división y dos
directives y dos aficiones engafentaes la una cola otra. D'una parte, l'Ayuntamientu ta armando
sobre la base del Astur un equipu nuevu pal que dicen que van fichar un
futbolista asturianu de categoría, mientres que pela otra, el presidente
Manuel Lafuente tamién apuntó al Real Uviéu pa la
competición d'esti añu en tercera. El Pumarín y
l'Universidá completaríen asina la representación
carbayona d'esti añu na categoría. Los socios del Astur tienen
esti vienres 15 una asamblea na que tienen de dar de pasu o echar
p'atrás la ufierta del Ayuntamientu, mientres que lo del Uviéu
tamién ye una incógnita dafechu, en cuantes que l'equipu ta
metíu en pufos inasumibles, con una delda que llega a los 7.000 millones de les vieyes pesetes, y nun se sabe tampoco con que xugadores va
contar.



Mientres l'afición carbayona yá tomo partíu por una
de les dos opciones, la del equipu históricu, manifestándose la
otra selmana peles cais de la ciudá contra la "opción
astur", la llucha por xugar nel Tartiere ye otru de los frentes de la
batalla por tener l'equipu de la ciudá. Mientres l'alcalde popular
Gabino de Lorenzo diz que l''estadiu construyose pal equipu d'Uviéu, y
non pal de Manuel Lafuente, los titulares del Uviéu SAD
encóntense nel contratu que tienen col Ayuntamientu pa nun dexar
l'estadiu, el más nuevu d'Asturies y con capacidá pa más
de 30.000 espectadores. Pela so parte, l'afición más roceana col proyectu de refundación del Astur CF carga contra los futbolistes, a los qu'acusa de precipitar la cayida poles demandes que punxeron contra l'equipu a cuenta de los impagos y ve na operación un intentu de dar un pelotazu urbanísticu mediante la recalificación del tarrén en que s'asitia l'estadiu Suarez Llana, onde xuega agora l'Astur.


En Conceyu Abiertu convidámosvos a opinar sobre la crisis del Uviéu ¿continuidá o refundación?