El frangüesu vuelve a Asturies

De va dellos meses p'acá ta dexándose ver pelos Picos d'Europa polo menos dos frangüesos, un páxaru carroñeru que llevaba desapaecíu d'Asturies dende va más de sesenta años. Desaniciaos cásique de toa Europa, los frangüesos quedaron arrequexaos a la parte del pirineo, onde s'entamaron va años midíes de recuperación que permitieron que la especie guañare y se llegare a una población de 400 exemplares. Como'l frangüesu suel dir espardiéndose per llugares nuevos según va multiplicándose la especie, l'area xeográfica que cubre ye cada vegada mayor, y ello ye que tan llegando a Asturies los primeros dende los pirineos a la parte de los Picos d'Europa.

Por ello la Fundación pa la Conservación del Frangüesu, que tien sé n'Aragón pero que yá ta operando n'Asturies dende va dellos meses con una oficina abierta en pueblu de Merodio, ta entamando una serie d'acciones col oxetivu d'amarrar a estos primeros páxaros que pasen per equí afalándolos a establecese nel oriente astur. Asina foi qu'esti fin de selmana entamó un repartu de falsos ñeros de frangüesu que representen ñeros de verdá ocupaos por páxaros adultos en tiempu de cría cola idega de que la presencia d'estos criaderos de mentira afale a los páxaros de verdá a añerar nesos sitios. La operación, abondo espectacular, requier de la collaboración de montañeros de la Guardia Civil que van encargase d'esguilar peles peñes pa mangar los ñeros.