El folk asturianu súmase a l’alcordanza d’Igor y Carlos

Seis años depués del accidente fatídicu que finó cola vida d’Igor Medio y Carlos Redondo, la música asturiana sigue ensin escaecer a los dos miembros de Felpeyu. Nesta ocasión va entamase un conciertu pop-rock y otru folk.
 
Tres el gran conciertu de la playa d’El Natahoyo nel 2007 n’alcordanza d’Igor y Carlos, tolos años el mundu de la música asturiana venía faciendo pa estes feches conciertos en delles sales de Xixón pa mantener vivu’l recuerdu de los dos artistes asturianos. Nél participaben bandes de rock y, pese a tar convidada, la xente del folk nun actuaba por razones téuniques. Esti añu, col oxetivu de que toos puedan homenaxear a los sos collacios Igor y Carlos, el conciertu va dividise en dos díes: ún pal rock, que va tener llugar mañana, y otru pal folk, que va celebrase’l xueves próximu.
 
La Sala Acapulco del Casino d’Asturies ye’l llugar escoyíu pa celebrar, a partir de les 21 hores, la cita col rock y el pop. Con entrada de baldre, el públicu va poder presenciar sobre l’escenariu a bandes como Desertores, Lucas y Los Patosos, Mamy Carter, Sangrientos, Silvidos y Gemidos (Delagua), Lecter Bukosky & Marcos Álvarez, Javier Costa Rico, Lavandera, Radio Fox y Los Izquierdos. Mentes, el Café Trisquel va acoyer el conciertu-homenaxe del mundu de folk el xueves 5, actu que va tener un cartelu espectacular: xente de Mezá (20 hores), xente de Llan de Cubel (20.30 hores), Verdasca (21 hores), xente de Corquiéu (21.30 hores), DRD y Alfredo González (22 hores), xente de Blima (22.30 hores), Tuenda (23 hores), Felpeyu (23.30 hores) y Tejedor (24 hores).