El final de la campaña de branu lleva a un aumentu del paru en 1.920 persones

El desemplegu medra n’Asturies per segundu mes siguíu. El 82 por cientu del aumentu del paru concéntrase nel sector servicios, 1.575 de los 1.920 rexistraos en setiembre, un crecimientu global del 3,53 por cientu, superior a la media estatal, del 0,73 por cientu.

Si n’agostu foi de namái 84 persones, el final de la campaña de branu provocó que’l númberu de demandantes d’emplegu ascendiera a 1.920. Asturies ye, en términos relativos, la comunidá autónoma que vive un mayor aumentu, yá que namás la ciudá autónoma de Melilla, coles sos circunstancies especiales en cuestiones estadístiques pola baxa población, presenta un peor datu, un 6,15 por cientu.

Siguen a Asturies na parte negativa de la llista Estremaúra (3,44 por cientu), Andalucía (2,29) y Galicia (2,28). Por contra, rexistren los mayores descensu del paru, que nel Estáu foi de 19.768 persones pa dexar el total en 2.722.468, La Rioja (4,88 por cientu), Euskadi (1,78) y Canarias (1,64).

En comparanza col setiembre anterior, el país tien 5.452 demandantes d’emplegu menos, una baxada del 8,82 por cientu, nesti casu superior a la media estatal, del 7,46 por cientu, un total de 219.451. Les meyores cifres son les d’Illes Balears (18,18 por cientu), Aragón (10,59) y Ceuta (10,13), mentes que los descensos más pequeños son los de Melilla (0,26), Comunidad de Madrid (2,32) y Euskadi (4,44).

Tamién tien Asturies más afiliaos a la Seguridá Social que l’añu pasáu, en concreto 6.127, una medra del 1,64 por cientu. Si tomamos como referencia’l mes anterior, hai 6.122 menos, que dexen el total en 378.944.

No que respeuta a la contratación, firmáronse un total de 20.362, 1.006 menos que n’agostu, lo que significa una baxada del 4,71 por cientu. En términos interañales ye del 15,17 por cientu, al contar con una cayida de 3.642.