El Festival de Bandes de Gaites Villa de Candás programa conciertos d'Algaire, Cerezal, Deira y Los Gascones

Agrupaciones d'Asturies, Breizh y Galicia participen xunto cola anfitriona nesti eventu que cuenta con un Mercáu Tradicional.

Dende esta tarde y hasta'l domingu los soníos de les gaites nun van aparar na capital de Carreño. Celébrase'l XXVI Festival de Bandes de Gaites Villa de Candás, qu'entama la Banda Gaites Candás, encargada d'abrir les actividaes a les 19.15 hores con un pasucais previu a la inauguración del mercáu, que va abrir de 18 a 22 hores y, el restu de díes, 11 a 22.

La bretona Kevrenn Brest Sant Mark va ser la primer formación convidada de fuera n'actuar, a les 20 hores, mentes que mañana a la mesma hora va facer el so primer desfile la gallega Banda de Gaitas Xarabal. L'actividá va arrancala a les 13 hores la Bandina d'Escolinos de la Banda Gaites Candás, mentes que pa les 19.30 hores ta previsto otru pasucais de l'agrupación de Breizh como preparación a la Nueche de Gaites, con entamu previstu a les 23 hores.

Darréu, a les 00.30 va tener llugar la primera de les trés xornaes de conciertos col tríu folk asturandaluz Deira y la bandina Los Gascones, pa dexar depués l'escenariu llibre.

L'eventu central, el sábadu

Kevrenn Brest Sant Mark va protagonizar nuevos pasucais el sábadu a les 13.30 y 19 hores, Xarabal a les 19.30 y la Banda Gaitas Conceyu Grau a les 20 hores. Les trés y Villa Candás van protagonizar a les 22.30 hores el desfile previu al XXVI Festival de Bandes de Gaites Villa de Candás, eventu central que tien llugar en Les Conserveres, mentes que va encargase de pesllar la nueche Cerezal.

El domingu ye siempre'l día de los concursos en La Baragaña: pela mañana'l VIII Concursu de Cuerpos de Percusión Villa de Candás (13.30 hores) y pela tarde'l VIII Concursu de Pareyes de Gaita y Tambor 'Memorial Diego Alonso' (18 hores). Van poner el ramu a estes cuatro díes de música en Candás les pandereteres d'Algaire con un conciertu a les 20.30 hores.

Na imaxe, un momentu del XXV Festival de Bandes de Gaites Villa de Candás en Les Conserveres. Semeya propiedá de la Banda de Gaites Candás.