El festival bretón Roeu Waroch dedica la edición del 2012 a Asturies

El XVI Roue Waroch, festival que va tener llugar los díes 17, 18 y 19 de febreru na población bretona de Pleskob, va tar dedicáu a Asturies. Delles bandes del país van llevar la nuesa música a esti eventu qu’axunta a miles de persones.
 
La representación asturiana en Breizh va ta formada por Tuenda, DRD, La Bandina y Menaxatrua Cuartetu, a los qu’hai que sumar delles persones que van participar n’actividaes del festival pa mostrar la música, la llingua y la danza d’Asturies. Asina, na primer xornada del Roeu Waroch, los componentes de Tuenda van dar una clase sobre música tradicional asturiana entes les 9 y les 17 hores pa, yá pela nueche, ufrir un conciertu con DRD (21 hores). Enantes, a les 18 hores, Menaxatrua Cuartetu van actuar xunto con los bretones Timothée Le Net Trio.
 
Pal sábadu, ente les 9 y 17 hores, Paulino García Santirso y María Vázquez Álvarez van impartir un cursín sobre les dances y les costumes del país, mentes que Tuenda van repetir actuación a les 18 hores, nesta ocasión acompañaos de los malíes Vieux Farka Touré. Pa zarrar la xornada, a partir de les 20.30 hores, va tener llugar una folixa na que van participar La Bandina y DRD xunto colos bretones IMG, MoTa, Barou-Guichen, Frères Keravec y Kanerion Bro Boïo. Mentes, l’actividá asturiana nel Roeu Waroch prevista pal domingu va principiar a les 12.30 hores con una xinta tradicional asturiana animada por Menaxuatra Cuartetu y va continuar, a les 16 hores, con una conferencia-debate entutilada ‘Bretagne/Asturies, comparación y estáu de la llingua asturiana y bretona nos dos países’.
 
Los bretones y visitantes que s’averen al festival entamáu pola asociación Petra Neue esta fin de selmana de febreru tamién van poder disfrutar estos trés díes d’un espaciu dedicáu a Asturies nel que prebar productos asturianos y beber sidra. Toles actividaes van desarrollase en Pleskob, población de 4.000 habitantes situada a 60 quilómetros de Lorient y a 85 del puertu de Saint-Nazère, conectáu por ferry con Xixón.