El diputáu d’ERC Joan Puig comprométese a rectificar la Llei de Llingües

Representantes d'Andecha Astur (AA) tuvieron ayeri una entrevista col diputáu d'Esquerra Republicana de Catalunya Joan Puig pa pidi-y al partíu catalán que rectifique la redacción orixinal de la Llei estatal de Llingües que propón ERC y que defende la oficialidá del gallegu nel occidente asturianu.

Según anunció AA, nel aconceyamientu que tuvieron representantes d'esta organización col representante de ERC esti manifestó que "la desconocencia y la falta cordinación con Andecha Astur nesti tema llevárelos a cometer lo que reconocen que ye un erru" siendo p'Andecha "una variedá del asturianu" la llingua que se fala nel ocidente asturianu. Según Andecha Astur el representante d'ERC comprometióse a presentar una propuesta nueva de llei na que la referencia a facer oficial el gallegu nel ocidente asturianu va camudase pola fórmula "facer oficial el gallegu nes fasteres onde se fale esta llingua" fórmula qu'escluyiría al dicir d'Andecha, la zona del Navia-Eo. Andecha acusa nel comunicáu a sectores interesaos n'atacar a AA de defender "una nueva llingua n'Asturies a la que llamen "gallego-asturiano". La formación nacionalista asturiana refuga esta denominación, que ye la oficial n’Asturies según la Llei d’Usu vixente y la qu'emplega l'Academia de la Llingua Asturiana pa les variadaes llingüístiques más occidentales d’Asturies, que son p’Andecha una variedá más del asturianu.


El partíu nacionalista asturianu diz que llamenta causá-yos tres de falar col diputáu d'ERC "un gran disgustu a los partidarios d'implantar el gallegu ente'l Navia y l'Eo" y "tamién a cuantos de mala fe desacreditaron con saña a Andecha Astur" en conociéndose la noticia de qu'ERC, socia d'Andecha Astur na candidatura al parlamentu européu "Europa de los Pueblos" demandaba nel so proyectu la oficialidá del gallegu nel occidente d'Asturies. Andecha denuncia tamién los "continos intentos de galleguización, coscientes y premeditaos nel ocidente asturianu" de los que culpa como "responsables inequívocos a los partíos en gobiernu asturianu (PSOE y IX-BA) y la so redolada".