El Día de la Muyer Rural celébrase en Sobrescobiu

Rosa Rodríguez González, de La Guardia del Cunqueiro, va recibir el Premiu Muyer Rural d'Asturies, y Anabel Santiago y Calea van animar el Mercáu instaláu en Rusecu.

Sobrescobiu acueye esti añu los actos conmemorativos del Día Internacional de les Muyeres Rurales, qu'entama la Rede Asturiana de Desarrollu Rural (Reader) con cartelería n'asturianu. Mañana y el domingu van entamase delles actividaes en Rusecu, cola entrega del Premiu Muyer Rural d'Asturies 2022 como eventu central, y como novedá, el I Mercáu de los 'Alimentos del Paraíso'.

Ente les 29 candidatures presentaes, el xuráu escoyó la de Rodríguez González, responsable de La Guarida del Cunqueiru, espaciu de Trabáu comprometíu con esta tradición del suroccidente asina como de la música y la llingua del país. Mañana va recibir esti reconocimientu nun eventu que va completase cola charra 'Otras miradas, otros mundos. Somos iguales, somos rurales', a cargu d'Ela López Chávez, coordinadora de la Escuela para la Igualdad y el Empoderamiento de la Mujer Rural d'Hondures; l'alderique 'Alzando la voz y sin desentonar desde el medio rural', nel que participarán artistes femenines fuertemente venceyaes al mediu rural; y la proyeición del filme 'Pan de limón con semillas de amapola', del direutor Benito Zambrano.

Apertura a les 10 hores

Más de 30 muyeres con productos adscritos a la marca de calidá 'Alimentos del Paraíso Natural' van ser les protagonistes, cola fin de dar visibilidá a la so importante función nel mediu rural. Dende les 10 hores, mañana y el domingu, van presentar carne, miel, quesu, vino, fabes, choscu y productos ecolóxicos.

Amás, prográmense actividaes infantiles, muestres de cocina, talleres gastronómicos y conciertos de Mina Longo (14 hores) y Anabel Santiago (20.30 hores), na primer xornada, y de Calea (14.30 hores), el grupu formáu por Leticia Baselgas, Silvia Quesada y Rubén Bada, na segunda.