El Día de la Llingua Materna consolídase como una xornada de reflexón y reivindicación de lo propio

|
Campaña ‘Asina los chamemos aiquí’ SNL Cangas

Esti domingu, 21 de febreru, celébrase’l Día Internacional de la Llingua Materna y Asturies nun ye una esceición. Esta xornada vien concentrando nos años últimos campañes y iniciatives en tol país, con especial fuercia nes escueles, onde va lleese esti llunes o martes un manifiestu y van entamase actividaes estos díes.

La Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) escoyó’l 21 de febreru como fecha pa celebrar esta xornada en reconocencia a los trés mozos que morrieron en Bangladesh nel 1952 polos disparos del exércitu paquistanín –qu’ocupaba’l país– nuna manifestación en Dhaka pola defensa de la llingua bengalí. El primer Día Internacional de la Llingua Materna foi nel 2000 y, dende entós, tolos años s’aprovecha esta fecha pa recordar la importancia de preservar toles llingües al ser éstes un patrimoniu común de la humanidá.

El tema escoyíu esti añu pa reivindicar na xornada ye ‘Fomentar el multilingüismu pa la inclusión na educación y la sociedá’, orientada sobre manera na defensa de les llingües indíxenes. “Trátase d’una cuestión esencial, porque, a escala mundial, el 40 por cientu de les persones nun tienen accesu a la educación na llingua que meyor falen o entienden, lo que dificulta tanto’l so aprendizaxe como’l so accesu al patrimoniu y a les espresiones culturales. Esti año céntrase l’atención na educación multillingüe dende la primer infancia, con oxetu de que la llinngua materna sía siempre una ventaya pa los neños”, espresa Audrey Azoulay, direutora xeneral de la UNESCO.

N’Asturies el Día de la Llingua Materna celébrase sobre manera nes escueles, col enfotu de rescamplar la importancia de la conocencia de llingües y concienciar de que’l cuidáu y la responsabilidá de caltener la de nueso, l’asturianu o’l gallego-asturiano, “ye un llabor de toes y toos y un apueste de futuru”. Asina mañana y el martes va lleese’l ‘Manifiestu pola Llingua Materna/Manifesto pola Llingua Materna’ y los escolinos van reflexonar sobre él.

Presentaciones y campaña de fauna y flora

Fuera del terrén escolar, son numberoses les actividaes programaes estos díes. Por exemplu, ayeri en Xixón entamóse la tercer edición del concursu ‘Xixón Fala en 3’, que tien como oxetivu fomentar l’usu del asturianu pa falar de cualesquier temática.

Mentes, en Cangas del Narcea’l Serviciu de Normalización Llingüística asoleyó pa celebrar la xornada la campaña ‘Asina los chamemos aiquí’. Trátase de cartelos con fauna (mamíferos y aves) y flora de la zona con ilustraciones de Mónica Jiménez acompañaes col nome correspondiente na variante occidente del idioma.

Contador Estadistiques