El dúu de txalaparta 'Oreka TX' toca n'Uviéu

La programación del ciclu de conciertos 'Música del Sieglu XX', entamáu por Caxastur, sigue n'Uviéu cola actuación del dúu de txalapartaris 'Oreka TX', que va ofrecer un espectáculu, mecigaya de música y imaxe.

El conciertu va tener llugar esti miércoles 17 de payares nel Centru Cultural Caxastur. La entrada ye llibre y gratuita hasta completar l'aforu.
  
'Oreka TX' ta formáu por Arkaitz Martínez y Igor Otxoa. Dende 1997, añu en que formen pareya como txalapartaris, trabayaron en distintos proyectos y formaciones en redol a esti instrumentu, entendiéndolo como un llugar d'alcuentru de músiques y cultures alloñaes y diverses.
  
N'entrando na agrupación de Kepa Junkera, formaron parte importante de les sos especiales presentaciones en directo. Tamién collaboraron en distintos proyectos discográficos con músicos como Phil Cunningham, Oskorri y Hevia.
  
Afondando na txalaparta tradicional, 'Oreka TX' esperimentó otros ritmos y timbres al traviés de les piedres, metales y otros materiales, algamando una sonoridá espectacular.

Nel escenariu va tener llugar un novedoso-viaxe nel que s'entemecen música y imaxes.