El CSD comunica a la FIFA la “inquietú” del Gobiernu estatal pola almisión de Xibraltar na UEFA

La posibilidá de que Xibraltar y los sos clubes puedan disputar competiciones internacionales inquieta al Gobiernu d’España. Asina lo treslladó’l presidente del CSD, Miguel Cardenal, al de la FIFA nuna xunta na sede del organismu en Zürich.

Cardenal, que tuvo acompañáu na reunión pol presidente de la Real Federación Española de Fútbol (RFEF), Ángel María Villar, espresó a Joseph Blatter el refugu del Executivu español énte la decisión adoptada recién pola UEFA en San Petersburgo. Según señalaron tres la reunión, el presidente de la Federación Internacional de Fútbol Asociación (FIFA) mostróse receptivu énte les quexes del presidente del Conseyu Superior de Deportes (CSD) y Villar, asina como n’otros asuntos sobre l’actualidá del fútbol mundial a nivel de seleiciones y clubes, aspeutos económicos y la candidatura de Madrid p'acoyer los Xuegos Olímpicos del 2020.

El 30 de setiembre pasáu, el Comité Executivu de la UEFA almitió de manera provisional a Xibraltar, en virtú d'una resolución del Tribunal d'Arbitraxe Deportivu (TAS) del 2011, como miembru del organismu. Sicasí, la decisión sobre la incorporación definitiva del Peñón como miembru de plenu derechu del organismu européu qu’axunta les federaciones de fútbol del continente nun va tomase hasta'l 24 de mayu del 2013, viéspora de la final de la Lliga de Campeones en Wembley y fecha prevista pal trixésimosétimu congresu de la UEFA.