El Conseyu del Patrimoniu Cultural aprueba actuaciones de restauración en monumentos prerrománicos

|
Berta Piñán nel Plenu del Conseyu del Patrimoniu Cultural

Santa María del Naranco, Santa María de Bendones y Foncalada van ser oxetu de proyeutos de restauración y caltenimientu. Asina decidiólo’l Plenu del Conseyu del Patrimoniu Cultural, onde tamién se dio’l preste al programa d’estudios y análisis de Santuyano previu a la intervención prevista de les sos pintures murales.

Con un presupuestu de 190.582 euros, l’actuación en Santa María del Naranco va consistir na correición de les filtraciones del esterior contra l’interior del monumentu, que se xeneren, sobre manera, al traviés de la fachada norte peles xuntes de los alcuentros de la mesma colos tramos este y oeste de la escalera, amás de dende l’antepar esterior, magar tar cubiertu, que da accesu na planta alta a la Sala de los Miradores. Va ameyorase amás la capacidá drenante del terrén circundante, con una pavimentación nuevo, qu’ha evitar qu’afontane la redolada con una meyora nel drenaxe y una canalización nueva del agua qu’arroya, y va executase un trazáu de la pavimentación qu’acompañe a los visitantes nun percorríu ordenáu alredor y al traviés del monumentu.

En Bendones va intervenise na cubierta de la ilesia de Santa María. La idea ye reorganizar de forma correuta la seición constructiva de la mesma y dexar el máximu aprovechamientu de los materiales esistentes (susceptibles de ser reutilizaos pol so estáu aceptable de caltenimientu), y resolver los defeutos qu’afeuten a los alcuentros de los faldones colos paramentos verticales de fábrica.

D’igual forma van impermeabilzase l’esterior de los murios dende la cota d’arranque de la cimentación hasta la rasante del terrén y va construyise una canal filtrante ventilada separtada de les fábriques con una trinchera drenante, amás d’una llimpieza del edificu. Los trabayos tienen un presupuestu de 112.392 euros.

Mentes, na fonte de Foncalada van facese llabores de caltenimientu y restauración por 35.481 euros. Van correxise los procesos d’alteración, realizar llabores de llimpieza, desaniciar algues, mofu, plantes y la costra caliar, y un retratamientu d’intervenciones anteriores, ente otros.

Otros monumentos prerrománicos

Pa Santuyano, llueu del preste d’ayeri, va ponese en marcha un plan d’actuaciones y midíes previu a la restauración de les sos pintures murales. Inclúi ensayos nos murios de mampostería del templu pa comprobar el so comportamientu énte distintes situaciones, amás de la propuesta futura d’un proyectu d’afitamientu del morteru orixinal y el drenaxe del muriu norte.

Amás d’estes actuaciones nos cuatro monumentos prerrománicos uvieínos, en Valdediós va habilitase un sitiu d’acoyida pa visitantes del Conventín y del Monesteriu de Santa María de Valdediós, nuna estancia asitiada al norte del cenobiu, nun llau de la plaza del accesu al mesmu y ocupando una esquina de la redolada llibre de la ilesia de San Salvador.

Más alcuerdos

Nel Plenu del Conseyu, presidíu por Berta Piñán, conseyera de Cultura, Política Llingüística y Turismu, decidióse tamién entamar colos trámites de declaración como Bien d’Interés Cultural (BIC) inmaterial la cultura del acebache, y col procesu pa incluyir nel Inventariu del Patrimoniu Cultural la cetárea Sport de Ḷḷuarca, la más antigua n’usu n’Asturies, y dos obres de Francis Bacon y Pablo Genovés pertenecientes a la coleición del Centru Niemeyer. Diose d’igual forma’l preste final a la tramitación siguida pa declarar BIC la llábana votiva romana de la Fortuna Balnearia, de Xixón, y analizáronse los pasos que la conseyería dio dende xineru pa empezar la declaración BIC del conxuntu de bienes patrimoniales y colecciones artístiques promovíes polos Selgas n’El Pitu.

Na semeya, Piñán –segunda pela derecha– nel Plenu d'ayeri.

Contador Estadistiques