El Conseyu de Gobiernu aprueba la prórroga presupuestaria

|

La prórroga presupuestaria nel 2016 yá ye una realidá. El Conseyu de Gobiernu aprobó esti miércoles el decretu que la regula y que va entrar en vigor el vienres, día 1.

Prorrogaránse los creitos iniciales aprobaos pal presupuestu del 2015, salvo aquellos destinaos a servicios o programes con vixencia llendada al exerciciu presupuestariu actual, tal como afita’l Testu Refundíu del Réxime Económicu y Presupuestariu (TRREPPA). D’igual forma, mediante’l decretu tamién se prorroguen les previsiones d’ingresos establecíos nos presupuestos del 2015.

Según informen dende’l Gobiernu, la Conseyería de Facienda y Sector Públicu revisará l’estáu d’ingresos que tendrá vixencia mientres la prórroga y, si’l volume d’ingresos estimaos fora inferior al prorrogáu, fadríense retenciones de creitu col oxetivu de caltener l’equilibriu presupuestariu. Los creitos pal 2016 han d’axustase a los oxetivos d’estabilidá presupuestaria, esto ye, deberán cumplir colos oxetivos de déficit y de deuda pública y cola regla de gastu que s’establecieron pa 2016 por parte del Gobiernu del Estáu. Nel casu de que sían insuficientes para dar cobertoria a los compromisos de gastu afitaos, tramitaríanse les modificaciones presupuestaries necesarias pa complementar estos creitos.

Al caxón les cuentes alcordaes pola FSA-PSOE y IX

Los grupos parllamentarios de la FSA-PSOE y Izquierda Xunida (IX) algamaren un alcuerdu pa sacar alantre los presupuestos pal 2016. La idea del Gobiernu yera contar tamién col sofitu de Podemos, pero tres llargos alderiques ente representates de los partíos, la postura de la formación liderada por Emilio León foi la de presentar una enmienda a la totalidá de los mesmos, al igual que fixeron el restu de formaciones de la oposición.

D’esta forma Podemos pretendía forciar la negociación d’un presupuestu nuevu nos díes caberos del añu, dalgo que nun se plantegó la FSA-PSOE, que de primeres apostó pol camín de la prórroga presupuestaria. Les cuentes del 2015, colos socialistes tamién nel Gobiernu, salieron alantre col apoyu del PP.

Contador Estadistiques