El Conseyu de Gobiernu aprobó la entrada de la gaita nos conservatorios

El Conseyu de Gobiernu d'Asturies dio-yos el preste na so sesión d'esti xueves 6 a la ordenación y currículu de la especialidá de Gaita nos graos elemental y mediu de la enseñanza musical y a les prebes d'accesu de la especialidá n'Asturies. Al traviés de la regulación del currículu oficial apúrrese-yos a los estudios de gaita'l rangu d'especialidá nel marcu de la normativa vixente pa les enseñances profesionales artístiques. El currículu de gaita va implantase nos conservatorios d'Uviéu y de Xixón y va tener un rangu y una titulación asemeyaes a les del restu d'instrumentos o especialidaes de los conservatorios.

L'inxerimientu de la gaita nes enseñances musicales oficiales ye una reivindicación de vieyo y enforma polémica nel mundu de la gaita asturiana. Pa dalgunos sectores la inclusión d'esti instrumentu nos conservatorios, colos sos esquemes d'enseñu, pue dir en contra del calter popular del instrumentu, anque la postura más estendida ente mayoría de los músicos de gaita que ye que'l fechu de la inclusión de la gaita nel conservatoriu diba desaniciar una discriminación pa con esti instrumentu, que merez tar nesti ámbitu educativu.

El conteníu d'esti currículum oficial adelantárase nes sos llinies mayestres a primeros del mes de marzu cuando la comisión de trabayu entamada al efectu pola Conseyería de Cultura y compuesta pol profesor de vientu del conservatoriu de Xixón Manuel Avello y los especialistes en gaita asturiana Pedro Pangua y Flavio Rodríguez dio a conocer un primer borrador de currículum.