El Congresu ratifica’l ‘non’ a Núñez Feijóo mentes Junts y ERC aumenten les esixencies a Sánchez

La segunda votación del Plenu d’Investidura, na que yera necesaria una mayoría simple, ratificó’l ‘non’ al popular Alberto Núñez Feijóo coles mesmes cifres que’l miércoles. La pelota pasará a Pedro Sánchez, que, depués de nun negar l’amnistía, atopa agora un alcuerdu de Junts y ERC por esixir tamién un referéndum d'autodeterminación.

Cola única novedá d’un votu equivocáu d’Eduard Pujol, diputáu de Junts, que finalmente contabilizó como nulu al correxir al momentu la so posición, terminó la investidura fallida de Núñez Feijóo. Al final, 172 votos a favor, los del so grupu parllamentariu (137), VOX (33), Coalición Canaria (1) y UPN (1), por 177 en contra –178 na anterior–.

La sesión arrancó con una intervención de 10 minutos del gallegu, a lo que siguió una fixación de posición de 5 minutos de los grupos parllamentarios. Pol PSOE tampoco nun tomó la pallabra Pedro Sánchez y repitió como voceru Óscar Puente.

Cuenta atrás

El miércoles, cola primer votación, arrancó la cuenta atrás pa qu’un candidatu algame los apoyos suficientes pa salir escoyíu presidente. Si en dos meses, el 27 de payares, nun hubiera investidura, celebraríense nuevamente eleiciones el 14 de xineru.

Depués d’una ronda nueva de consultes del rei colos representantes de los grupos parllamentarios, lo lóxico ye que Felipe VI proponga a Sánchez como candidatu. De manera paralela, el PSOE sigue negociando pa contar colos apoyos suficientes, pa lo que necesita un alcuerdu con Junts y, tamién, con ERC.

L’amnistía yera la esixencia catalana pa sofitar al socialista, una cesión a la que ta dispuestu Sánchez, pero güei nel Parlament Junts y ERC, cola astención de la CUP, sacaben alantre una moción pa condicionar la investidura a negociar les condiciones pa la celebración d’un referéndum. El PSOE yá anunciaba ayeri que per esa vía “nun hai avance posible”.

Na semeya, vista del hemiciclu dende arriba nel momentu de la so intervención d'esta mañana, con Sánchez, abaxo a la derecha, escuchándolu dende'l so escañu.