El Congresu del Horru asturianu demanda un inventariu d’estes construcciones

Xosé Nel Navarro, organizador del congresu, sorraya que "esta iniciativa nun pue quedar equí" y congráciase del bon resultáu del congresu en términos d'asistencia de públicu y aportaciones de los congresistes.

Ayeri acabó n'Uviéu el I Congresu del Horru, un acontecimientu únicu nel que los espertos abordaron a lo llargo de dos xornaes los aspectos más importantes sobre esti elementu del patrimoniu asturianu. L'organizador del certame, Xosé Nel Navarro, esplicó a Asturies.com que les conclusiones del congresu que tan ellaborándose van llamar l'atención sobre la falta que se tien d'un censu d'estes construcciones nel que s'enxerten en fiches individuales toles característiques técniques, artístiques y de conservación de caún de los más de 15.000 horros que queden espardíos per tola xeografía asturiana. Navarro defendió la importancia d'esti inventariu y manifestó estrañase de que nun lu haya en cuantes que l'horru ye una construcción que tien los sos exemplos más antiguos dataos nel sieglu XV.

Ente les primeres idegues qu'aportó al debate sobre l'actualización del horru pa nuevos usos dientro d'un sociedá y una economía nes que les funciones tradicionales del horru como graneru agrícola yá tan en desusu, Navarro apuntó que nel congresu apuntáronse posibilidaes como la de venceyar horru con itinerarios y productos culturales como'l Camín de Compostela. Según l'escritor y organizador del congresu "L'horru foi símbolu de la prosperidá d'Asturies y pue selo otra vuelta pero buscándo-y nueves aplicaciones". Afondando nel conteníu simbólicu del horru, Navarro comparolu colos "cubos de la memoria" d'Ibarrola y esplicó que l'horru ye tamién un "cubu de la memoria y un graneru d'idees". Finalmente,

l'alma d'esti primer congresu sobre l'horru llamó l'atenciónsobre la necesidá de que la iniciativa nun muerra equí, apuntando la necesidá de da-y continuidá al congresu y,sobremanera, a aplicar les sos conclusiones.