El Condáu de Llaviana por Eladio Begega

El Muséu del Pueblu d'Asturies de Xixón celebró ayeri pela mañana una xornada d'inauguraciones na que se presentaron dos esposiciones temporales de fotógrafos asturianos y tamién un llagar orixinal de finales del XIX trayíu dende la parroquia villaviciosina de Tuero que va quedar como elementu d'esposición permanente nel Muséu.

D'una parte, la esposición "Dos visiones fotográfiques d'Asturies" axunta la obra de Juan E. Canellada Pría y d'Eladio Begega. El primeru, aparte de ser padre de la conocioda escritora y estudiosa de la llingua asturiana María Xosefa Canellada, tuvo'l méritu de retratar les escenes de la vida cotidiana y ritos de pasu del conceyu de Cabranes nel primer cuartu del siegu XX, mientres qu'el segundu, yá n'otra época distinta como ye'l periodu de 1.960 a 1.985, anduvo paseando les sos cámares Nikon pela parroquia llavianeta d'El Condáu.

A Canellada y Begega sepártenlos los años y, lóxicamente, un mundu enteru na manera de pescanciar l'arte fotográficu, siendo, eso si, fíos bien dignos del tiempu que-yos tocó vivir a caún. D'una parte l'amuesa de Canellada, dexando aparte l'evidente intrerés etnográficu, débese a los canones de la fotografía social d'aquel tiempu, con xente posando énte una enorme cámara de plaques y vistiendo fatos que nun yeren precisamente los que gastaben d'a diario.

D'otra parte, la esposición de Begega presenta al públicu un rexistru muncho más documental y cotidianu, cosa facilitada en gran parte pol emplegu de cámares de 35mm y película rápido. L'amuesa de Begega una riestra interesantísima de retratos de xente del pueblu d'El Condáu, retratando a los aldeanos en tomes dacuando monumentales que remembren a les semeyes de los fotógrafos americanos de la FSA y retratando tamién a los xitanos del pueblu en llabores como la de facer paxos. El trabayu de Begega aporta tamién escenes d'un periodu históricu poco documentáu y que de xuro van resulta-yos sorprendentes a quien visite la esposición, lo mesmo poles poses informales que busca l'autor (vease la semeya qu'acompaña esta noticia) que polo que ye conteníu estrictamente documental, qu'avera muncho pa contra los nuestros díes un mundu que taba pa firmar la carta de defunción. Les semeyes que fai Begega d'El Condáu son les caberes señales d'un mediu de vida y d'unes técniques agrícoles y modelos d'esplotación que yá d'aquella diben contra la norma y que nun podíen durar muncho más. Ensin dulda que viéndoles l'espectador tien más datos pa pescanciar la evolución y la crisis d'un mediu rural asturianu qu'amás apaez nes semeyes ayenu a tolos terremotos políticos que secudíen la sociedá asturiana nos años 60.