El concursu Entaína a Escribir axunta a autores d'ente 14 y 35 años

|
Cubierta 'Entaína a escribir'

Esta séptima edición del certame cambia de fecha, pasando de mayu a ochobre.

Esta tarde, a les 18.30 hores, va celebrase na uvieína Sala Borrón, el VII Entaína a Escribir, el concursu de microrrellatos improvisaos n'asturianu empobináu a xente mozo d'ente 14 y 35 años. Hasta les 14 hores ye posible apuntase nel corréu electrónicu cridj@asturias.org indicando nome, apellíos y fecha de nacencia.

Los participantes han escribir un microrrellatu nun tiempu máximu de 20 minutos a partir del tema y indicaciones que’l xuráu dicte al empezar l'actividá. Los trés meyores van recibir un premiu, que va consistir en llotes de llibros y discos, amás de contar cola posibilidá de ser publicaos en volúmenes antolóxicos qu'asoleye la Direición Xeneral de Política Llingüística, mentes que tolos participantes van llevar tamién un llibru.

Amás, el ganador o ganadora va participar como xuráu nos premios Culturaquí 2021 que convoca l’Institutu Asturianu de la Mocedá. Entaína a Escribir ye un concursu entamáu poles direiciones xenerales de Política Llingüística y Mocedá, Diversidá Sexual y Derechos LGTBI que venía celebrándose en mayu nel marcu de la Selmana de les Lletres Asturianes y ésta ye la primer vegada que pasa a la seronda, siendo'l ganador últimu Inaciu Galán con 'La llibretina' a partir d'un versu de Nel Amaro.

Na imaxe, cubierta del llibru 'Entaína a escribir' que recueye los testos premiaos nes seis primeres ediciones (2016-2021). Semeya propiedá de Llibrería Trabe.

AdxuntuTamañu
PDF icon Bases VI Entaína a Escribir349.5 KB
Contador Estadistiques