'El conciertu d'Ígor Medio' enllenó d'emotividá y folk el teatru de la Llaboral

|
El conciertu d'Ígor Medio

La XLIII Selmana de les Lletres Asturiana tien el xueves otra cita musical, el 'Conciertu de les Lletres' de la OSPA nel Auditoriu d'Uviéu.

Poques vegaes va poder vese tanta calidá musical xunta enriba d'un escenariu. Foi nos bises de 'El conciertu d'Ígor Medio' cuando 25 de los meyores artistes del mundu folk asturianu axuntaron les sos voces y instrumentos pa interpretar 'Alboraes' y 'Tierra' n'alcordanza d'una persona mui quería, clave pa entender esti estilu anguaño.

Yeren los integrantes de Felpeyu y los munchos convidaos que xubieron a tocar a lo llargo de les dos hores d'una actuación enllena d'emotividá que quedó grabada pa la posteridá. Ruma Barbero, ún de los coordinadores de la XLIII Selmana de les Lletres Asturianes, introduxo caún de los temes interpretaos y presentó a los musicos que participaron nesta actuación qu'axuntó a cientos de persones na Llaboral.

La llista yera llarga, con nomes como José Manuel Tejedor, Mapi Quintana, Bree Delian, Alberto Sánchez, Xuan Nel Expósito, Cástor Castro, Félix Castro, Toño Gómez, Xel Pereda y Isidro Suárez, y integrantes de Tuenda, DRD, La Bandina’l Tombo y Corquiéu. Tuvieron tolos temes clásicos de Felpeyu como 'Canteros', 'Llevántate neña' o 'Los fayeos de mayo', amás de dalgún otru de Dual, como 'Penouta', o de Tuenda reforzáu por Alberto Ablanedo, con recuerdu tamién pa Elías García.

TPA va emitir próximamente esti conciertu que pasa a la historia de la música asturiana.

Dos estrenes

La música va siguir protagonizando la gran fiesta de la nuesa lliteratura cola celebración del 'Conciertu de les Lletres'. La Orquesta Sinfónica del Principáu d'Asturies (OSPA), dirixida por Daniel Sánchez Velasco, con Héctor Corpus como violinista solista, va intepretar trés pieces, de les que dos son estrenes absolutes.

Son 'Concierto para violín y orquesta’, del propiu Sánchez Velasco, y 'Tributo a Richard Estes’ de Juan Méndez, mentes que completa'l programa 'Córdoba en un sueño’, de Raquel Rodríguez. L'actuación principia a les 20 hores d'esta tarde nel Auditoriu d'Uviéu y la entrada ye de baldre previa retirada d'entrada, con asientos entovía llibres.

 

 

Contador Estadistiques