El Conciertu d’Asturies nun foi a enllenar l'Espace Marine

Tejedor, Mari Luz Cristobal Caunedo, Nuberu y Victor Manuel ficieron ayeri’l conciertu d’Asturies nel Espace Marine.

La nueche d’ayeri quería ser una de les más especiales dientro de los conciertos programaos pa esti Festival, y yá la Conseyera de Cultura emponderare'l "Concierto de Asturias" como l'aportación más curiosa de la representación asturiana. Sicasí, paez ser qu'al públicu bretón nun-y prestó muncho la propuesta del "Concierto de Asturias". Nun hebo munchu ambiente, y namás unes 1200 persones s'aconceyaron pa ver una repetición calcada del conciertu del pasáu 7 de setiembre n’Uviéu. La única novedá que pue mencionáse sobre l'espectáculu orixinal ye’l montaxe teatral qu’acompañó a delles canciones y que remató al final del conciertu con un cuelebre xigante qu'anduvo pente’l públicu, too ello por obra del grupu teatral asturianu Nun Tris, qu'amás tamién va representar la so obra "Brenga" estes dos prósimes nueche nun prau que ta a la vera de la sidrería Asturiana.

Pa esta nueche, los avilesinos Dixebra dan l'últimu de los dos conciertos que tienen programaos nesti Festival, anque esta vez va ser nel Pub, un requexu pa la música más movío nesti Festival de Lorient y que s'acuta pa aquellos grupos qu’inviten, yá dende la primer nota, a echar unos bailles o pegar unos blincos.