El comité d'empresa de la fábrica de La Vega anuncia movilizaciones pa evitar el treslláu a Trubia

|

Paros, zarros y concentraciones van ser les armes que van utilizar los trabayadores de la fábrica de La Vega pa evitar el treslláu de la producción a Trubia. Esti martes tán llevando la so problemática a los grupos de la Xunta Xeneral.
 
Les movilizaciones pretenden que "el Ministeriu de Defensa convoque les reuniones que tien pendientes con organismos llocales y autonómicos, y que oficialmente, más allá de declaraciones nos medios de comunicación, se pronuncie sobre’l pieslle de La Vega, yá qu’ésta tien reconocía la consideración de Fábrica d’Armes de Guerra, lo qu’asigna al Ministeriu de Defensa la competencia pa l’autorización d’establecimientu, modificación sustancial o treslláu de les fábriques d’armes de guerra", esplica’l comité d’empresa nun comunicáu. Los trabayadores consideren "agotada" la vía de negociación cola direición de la empresa porque "ésta nun aportó nengún datu que xustifique’l zarru de La Vega y el treslláu de los sos trabayadores a la fábrica de Trubia. Les numberoses reuniones que se mantuvieron reafírmennos nel nuesu analís, polo que siguimos calteniendo que la direición, con esta actuación, trata d’acabar cola actividá industrial de la fábrica de La Vega".
 
Asina, les movilizaciones incluyirán "paros indefiníos, zarros y concentraciones", y tarán abiertes "a lo que les circunstancies nos deparen". Esta mañana, los trabayadores treslladaron la so problemática a tolos grupos parllamentarios na Xunta Xeneral mentes compañeros manifestábense na puerta. Los paros previstos na fábrica, de cuatro hores de duración, van tener llugar los llunes, miércoles y vienres de manera indefinía.
 

Contador Estadistiques