El comerciu electrónicu va poner l'IVA

La obsesión de les Alministraciones Públiques por regular tolo rellacionao cola rede d´Internet nun apara. Una de les alministraciones más interesaes en exercer el so control sobre Internet ye ensin dulda l´Alministración Tributario, que ta atendiendo al comerciu electrónicu como nunca lo ficiere primero. Dende hai tiempu les autoridaes económiques de les principales potencies del mundiu tan mirando de calzar los impuestos reales al mundiu virtual, fiscalizando tou tipu d´operaciones ellectróniques, pero hasta agora nunca se punxeren en serio con ello.

El casu ye que anque Estaos Xuníos tien una amnistía fiscal (que va durar bien poco) pa les operaciones de comerciu electrónicu, la Xunión Europea dio un pasu alantre en materia de fiscalidá na rede. A partir del prósimu 1 de xunetu entra a furrular una nueva directiva comunitaria pola que toles empreses d´Internet deben poner l´IVA nes sos operaciones de comerciu electrónicu. La directiva manda pa les operaciones online un recargu por IVA ente´l 17% y 25%, un tantu que gravaría la venta de llibros, la descarga de música o software de pagu o les actividaes rellacionaes coles subastes online, ente otres operaciones, ello namás por dicir les que más afecten al común de los mortales. El comerciu ente empreses tamién va recibir esta carga fiscal.

Ello ye que n'Europa les empreses europees d´Internet vienen dende hai tiempu cargando l´IVA nes sos operaciones, mentantu que les empreses de fuera de la Xunión Europea pero que vienden en territoriu européu nun lu carguen. Esto supón una desventaya pa les puntucom del Vieyu Continente en favor d'otres empreses, norteamericanes les más d'elles. Agora les coses van camudar, y los vendedores na rede europeos van competir n'igualdá, a lo menos tributario, coles grandes empreses norteamericanes. Un exemplu perclaru ye´l d´AOL en Gran Bretaña, onde tien un aforru d´IVA anual de 250 millones d´euros, en perxuiciu de la so competidora de guañu británicu Freeserve. Amás d´AOL otres empreses puntucom norteamericanes afectaes pola midia son Amazon y eBay. Estes empreses tan estudiando estratexes pa contrarrestar la nueva directiva, como l'asumir el coste del IVA de los clientes o armar una filial europea con toles consecuencies llegales.