El COFPA reclama esplicaciones al Gobiernu d’Álvarez-Cascos por “caltener la deucracia”

El Conceyu por otra Función Pública n’Asturies (COFPA) alerta de la intención del Gobiernu d’Álvarez-Cascos de caltener la deucracia, incumpliendo asina’l so programa eleutoral. Considera que ta siguiendo práutiques continuistes.
 
“Foro Asturies presentóse a les eleiciones con un programa políticu que recueye delles propuestes de reforma de la xestión pública copiaes del documentu ‘30 midíes pa la rexeneración de l'Alministración Pública asturiana’ espublizáu pol Conceyu por Otra Función Pública n´Asturies. Ente elles, la de xeneralizar ‘el concursu de méritos como procedimientu ordinariu de provisión de puestos de trabayu, llindando la llibre designación a supuestos esceicionales debidamente xustificaos’”, espliquen dende’l coleutivu. Una midida que, por el contra, l’Executivu de Francisco Álvarez-Cascos paez nun cumplir. “Un mes depués de la toma de posesión, el Gobiernu que preside acaba de treslladar a les organizaciones sindicales una propuesta de rellación de puestos de trabayu na que tolos puestos de xefatura de serviciu, ensin esceición, nómense pol sistema deucráticu de la llibre designación, que se xeneraliza pa esta categoría de puestos ensin la xustificación o motivación específica que vien esixendo una repetida, constante y uniforme xurisprudencia del Tribunal Supremu y como sentenció n'Asturies el Tribunal Cimeru de Xusticia”, continúa’l comunicáu del COFPA.
 
Esti coletivu considera que “l'aprobación per parte del Gobiernu del PSOE-IX d'una llei de llegalización de los nomamientos a deu nun puede sirvir d'escusa, pues trátase d'una circunstancia anterior bien conocida, a la que quería dar respuesta'l programa eleutoral de Foro Asturies” y entrúgase qué llevo a FAC a camudar tán pronto d’opinión. “El balance hasta la fecha complétase cola ufierta de puestos na solombra y el tapecimientu de los nomamientos d´asesores de los gabinetes –personal eventual–, práutiques continuistes reñíes cola tresparencia na política de personal”, señala.
 
Por último, el COFPA reclama al Gobiernu d’Álvarez-Cascos y al so partíu una esplicación por esta situación. “Por hixene democrática, equí yá nun val callar”, asegura.