El ciclu Autores nel Camín arranca en Corvera cola presencia de Gonzalo G. Barreñada

Esti programa de la Conseyería de Cultura, Política Llingüística y Turismu naz pa poner en contautu col públicu a los ganadores de los sos diferentes premios n'actos per tol país.

Gonzalo González Barreñada, ganador del XXV Premiu Xuan María Acebal de poesía, correspondiente al añu 2019, con 'El llar n'orde' ye'l primer creador que va participar nel circuitu lliterariu Autores nel Camín, nome que xuega tamién col Xacobéu que se ta celebrando esti añu. L'escritor de Sotrondio va tener un alcuentru esta tarde con llectores que tomen parte nel Taller de Llectura n'Asturianu de Corvera qu'entama la Casa de la Llingua.

Antón García, direutor xeneral de Política Llingüística, y l'alcalde Iván Fernández García van acudir a esta actividá, prevista pa les 18 hores nel Centru Sociocultural de Les Vegues. D'esta forma, aprovechando la cercanía del Día del Llibru, que se celeba mañana, inaugúrase esta iniciativa de la conseyería.

En feches próximes, mentes, gracies a Autores nel Camín, tamién van pasar per Corvera otros ganadores como Francisco 'Paco' Álvarez, José Ángel Gayol, Sidoro Villa, Xune Elipe o Ruma Barbero.

Retrasada pola pandemia

La puesta en marcha del circuitu lliterariu taba prevista pal 2020, pero la crisis de la pandemia obligó a retrasala. Por esti motivu, la programación tien en cuenta tanto a los autores ganadores de la edición última de los Premios Lliterarios y artísticos como de los de la del 2019.

Nava, Candás, Llangréu, Colunga, Grau y Ḷḷena son los llugares que tamién van acoyer actividaes d'Autores nel Camín nesti primer semetre, que van tener dellos formatos, como alcuentros, talleres o recitales. Inaciu Galán, Vero Suari, Alberto Vázquez, y Lafu y Rebeca son otros de los participantes nesta primer programación, que se va ampliar na segunda parte del añu tamién con creadores en gallego-asturiano.

Na semeya, Barreñada nun actu de presentación de la so obra 'El pesu de la lluz' nel puestu d'Iniciativa pol Asturianu na Feria Internacional de Muestres d'Asturies (FIDMA) del 2019.