El CES destapa les contradicciones de la economía asturiana

El Conseyu Económicu y Social d'Asturies, órganu formáu por representantes de les alministraciones públiques y una riestra d'axentes sociales que va dende la patronal a los sindicatos, ta acabante d'espublizar l'Informe d'Análisis de la Situación Económica y Social d'Asturies correspondiente al añu 2.002. Les conclusiones d'esti documentu demuestren qu'Asturies, en cuenta d'averase a la media del estáu, ta afondando un añu más nes contradicciones y peculiaridaes económiques que vienen marcando dende cuantayá'l pulsu económicu del país.

Ente otros datos, el CES reconoz que, anque hubo mayor actividá económica, el paru xubió más, enanchando una de les mayores resquiebres d'Asturies coles mediesestatales, como ye'l que la tasa d'actividá asturiana seya del 44,7% contra'l 54 estatal. En cuantes a la estrutura del mercáu llaboral, el CES rescampla que'l paru xuvenil ta nel 23% una tasa mui alta que s'espeya na cantidá de mozos que salen a trabayar fuera. Al paecer del CES, ello espeya d'una parte la poca capacidá pa crear emplegu del país y, d'otra parte, el desfase ente les necesidaes del mercáu y la formación recibío. En rellación al universu llaboral, el CES diz tamién que nel 2002 baxo'll númberu de centros de trabayu nuevos y espoxigó'l de trabayadores en situación de regulación.

Nel tema de les pensiones, el CES destapa ún de los mayores desequilibrios al dicir que, mientres la pensión media asturiana ye de 626 euros mensuales contra 516 de media estatal, llama l'atención que'l 30 por ciento del total de pensiones nun llegue a los 300 euros.

El CES sorraya tamién la xuba del preciu de la vivienda, de la que diz que triplicó'l preciu dende 1987 p'acá, pasando'l metru cuadráu de 328 euros a 986. Estos precios obliguen a les families y individuos a mandar el 39% de los ingresos a l'alquisición de la vivienda. Pa remachar la mala situación del mercáu de la vivienda, el CES diz que la construcción de vivienda de protección oficial baxó enforma de va unos años p'acá, y, anque reconoz que nel 2.002 la cosa repuntó p'arriba, lo poco que se construye ta dafechu en manes de la iniciativa privao, siendo simbólica la parte d'iniciativa público. L'estudiu del 2.002 va tar d'equí a poco na web del CES, que tien colgáu l'estudiu correspondiente al 2.001