El censu oficial rescampla los problemes del osu n'Asturies

La Viceconseyera de Mediu Ambiente y Ordenación del Territoriu, Belén Fernández, presentó esta mañana l'estudiu xenéticu del osu pardu n'Asturies, que se fizo ente los años 2002 y 2003 gracies a un conveniu ente'l Muséu Nacional de Ciencies Naturales y la mesma Conseyería. L'oxetivu d'esti estudiu yera conocer la "salú xenético" de la población d'osos y facer un censu más precisu que los que s'emplegaben hasta agora

La dulda más grande que tenía d'iguar l'estudiu yera la de ver si con una población tan pequeña podíen haber problemes de cosanguinidá y tamién conocer si había rellación ente los dos grandes noyos de población osera, l'occidental y l'oriental. Ello ye que coles muestres que se lleven estudiaes hasta agora sal un censu de 51 animales nel occidente y una población simbólica de 3 nel noyu oriental. Descompensaos nel territoriu, los osos asturianos tampoco nun tan igualaos en sexós, con 22 machos por 16 femes. Estos datos son sobre los osos que se lleven censaos, que nun son, nin con muncho, la totalidá de la población, y asina los responsables de l'estudiu periten que la población total del noyu occidental tien un mínimu garantizá de 81 animales, anque dan como más posible la cantidá de 118.

Un datu enforma negativu del estudiu ye que, amás de que los valores de variabilidá xenética foron enforma baxos, demostróse que los marcadores xenéticos de los osos del oriente y del occidente yeren distintos, ello ye, nun hai contactu xenéticu ente los dos conxuntos poblacionales. L'estudiu diz que la recuperación d'esti contactu ente osos orientales y occidentales ye daqué enforma necesario y cásique imprescindible pa la recuperación de la especie.