El CD San Martín abandona la competición de forma definitiva

L’asamblea de socios celebrada’l vienres en Sotrondio decidió la retirada del CD San Martín de la preferente y complica’l futuru de la entidá, que mantién de momentu los equipos de base. D’esta forma, namái dos clubes baxarán a primera esti añu.
 
Na reunión, que contó cola participación de 48 de los 62 socios del club sotrondín y un miembru de la Federación de Fútbol del Principáu d’Asturies –el Conceyu de Samartín del Rei Aureliu nun unvió representación–, nun salió alantre la constitución d’una xestora y decidióse que’l primer equipu de la entidá fundada nel 1950 nun siguiera en competición. Sicasí, los equipos de base del San Martín sí continuarán lo que queda de temporada.
 
Esta postura, pese al esfuerzu de plantiya y cuerpu téunicu de siguir competiendo, llevó al equipu de Sotrondio a nun presentase al partíu previstu pa les 16.45 hores d’ayeri n’El Florán contra la Unión Comercial, un choque que se presumía clave pa los dos clubes pa salir de los puestos de descensu a primera autonómica. Finalmente, los trés puntos son pa los de Tudela Veguín con un resultáu de 0-3, yá que’l San Martín tovía nun se dio de baxa de manera oficial de la competición. Asina, la Federación anunció l'horariu del choque de la xornada próxima, ente l'Avilés B y los del Florán, pal domingu a les 12 hores en La Toba II. De nun dase nenguna solución d’última hora, el restu d’equipos que tengan qu’enfrentase a los de Sotrondio van recibir trés puntos –se mantendrían los resultaos anteriores, anque col casilleru de goles a cero– y serán dos los clubes que desciendan esti añu de preferente.