El Caudal cumple en Cayón y recupera l'optimismu

L'UP Langreo trai un bon resultáu d'Haro de cara a certificar el pase a la ronda definitiva pol ascensu a Segunda B en Ganzábal.

Incontestable foi'l trunfu del Caudal en Cayón esti sábadu por 0-2 con goles de Jaime y Quero, dambos na segunda metá. Deprendida la leición de Boiro, los d'Iván Ania salieron concentraos al partíu y nun concedieron nada al equipu cántabru. Asina, con un xuegu mui físicu, sentenciaron tres la reanudación, dexando too a favor de cara al partíu de vuelta, que va xugase'l domingu a les 18 hores.

Pela so parte, l'Unión sumó un empate a un gol n'Haro, tantu de Nacho Calvillo que pue ser clave na eliminatoria. Los llocales adelantáronse nel minutu 52 nun corner por mediu de Dani Palacios, pero la igualada azulgrana a los 16 minutos permite a los d'Hernán Pérez trayer una pequeña ventaya pa Ganzábal, partíu que va disputase tamién a les 18 hores del domingu.