El cartelu del Día de les Biblioteques del ministeriu cuenta esti añu con una versión única pal asturianu

|
Cartelu Día de les Biblioteques 2023

N'ocasiones anteriores diferenciábase ente 'bable' y 'asturleonés'. El lema emplegáu esti 24 d'ochobre ye 'Texendo comunidaes'.

Güei celébrase'l Día de les Biblioteques, xornada entamada pola Direición Xeneral del Llibru y Fomentu de la Llectura, al traviés de la Subdireición Xeneral de Coordinación Bibliotecaria, pa fomentar esti serviciu públicu. El diseñu del cartelu promocional d'esti añu ye obra de Nuria Riaza y el Ministeriu de Cultura y Deporte asoléyalu en toles llingües del Estáu.

La diferencia colos cartelos d'años anteriores ta en qu'esiste una versión única pal asturianu, refiriéndose al idioma como 'asturiano', cuando n'ocasiones pasaes el ministeriu estremaba ente 'bable' y 'leonés', primero, y 'asturleonés' depués pa esta variante, argumentando nun primer momentu a consulta d'Asturies.com que yera'l nome qu'apaecía nos estatutos d'autonomía. 'Castellano, 'catalán/valenciano', 'euskera', 'gallego', 'lengua occitana (aranés)' y 'altoaragonés' son los glotónimos emplegaos nesta edición.

Otra novedá ye la presentación d'etiquetes de promoción de les xornaes en redes sociales, pa buscar ser tendencia, en llingua asturiana: #DíaDeLesBiblioteques y #TexendoComunidaes. L'añu pasáu l'asturianu quedó fuera xunto col aranés y l'aragonés del llistáu espuestu.

Centros de conexón y aprendizaxe

'Texendo comunidaes' ye'l lema emplegáu esti Día de les Biblioteques, col que'l se pretende rescamplar "el papel fundamental que desempeñen les biblioteques na construcción de llazos fuertes dientro de les nueses comunidaes. Estes instituciones son centros de conexón y aprendizaxe, onde les histories, les esperiencies y los conocimientos son los filos que xunen a los ciudadanos".

El Gobiernu d'Asturies tamién asoleya ún

Asturies tamién se xune a la celebración del Día de les Biblioteques con un cartelu propiu. Ésti cuenta con una versión única trillingüe en castellanu, asturianu y gallego-asturiano, y el logu del Gobiernu en llingua asturiana.

Contador Estadistiques