"El cantar nun ta en Llingua Asturiana"

Esta ye una de les declaraciones que fizo Xune Elipe Raposo a Asturies.com al rodiu del resultáu del Premiu al Meyor Cantar n'Asturianu entregáu pola SGAE la otra selmana y que xeneró bien de polémica na comunidá musical asturiana. Nos próximos díes siguiremos espublizando más valoraciones de persones rellacionaes cola música n'asturianu sobre esti asuntu.

En primer llugar el cantante de "Dixebra" quixo dexar bien claro "qu'algamar que se creara esti premiu yera daqué, de mano, positivo pa la música n'asturianu". Esta yera una revindicación de vieyo de munchos músicos asturianos y qu'esti añu "consiguiérase arrancar a la SGAE nel últimu momentu gracies al trabayu continuáu de muncha xente". Con too y con ello pa Xune Elipe de mano yera "relativamente poco importante quien llevara'l premiu anguaño".

Una vez vistu'l procesu pa seleccionar al premiáu y escuchar el cantar ganador Xune llega a dos conclusiones principales. La primera ye que "Ente la terna finalista nun taba'l meyor cantar n'asturianu del añu 2003" . En segundu llugar el fundador de Discos l'Aguañaz na so condición de sociu de la SGAE espresó'l deséu de que pal añu que vien cambie la forma de llevar alantre'l premiu, porque esti añu foi horrible y esta traza de llevar les coses consigue que se desprestixe'l premiu."

No que cinca'l cantar ganador, "Nunca mais" interpretáu por Manolo Morán y escritu por Pepín Robles, Xune Elipe comenta que "con tol respetu pol interprete y el creador, nun representa pa nada a la música n'asturianu, y ta completamente fuera de llugar". Centrándose na polémica lletra del cantar ganador, el responsable de Discos L'Aguañaz ye bien claro. "Nun ye llingua asturiana". Con too y con ello Xune llega a la conclusión de que "ganando esti cantar consiguióse que'l premiu al meyor cantar n'asturianu pasara desapercibíu"

Raposo ye especialmente críticu col procesu de selección de candidatos y col ganador. Nesti sentíu nun entiende "porque dende'l principiu nun se fizo'l procesu como nel restu de candidatures". Dende Asturies saliere una selección inicial fecha pol periodista Aurelio Argel que vieno de vuelta a Asturies con delles incorporaciones, ente elles la del cantar ganador "Nunca Mais" de Manolo Morán. Xune critica que "nun pudimos como discográfica proponer candidatos pa la categoría de meyor cantar n'asturianu, cosa que si pudimos facer pa otres categoríes, como por exemplu meyor cantar en gallegu", "tuvimos que votar sobre una llista prefabricada, y amás yo solo pudi votar como L'Aguañaz, non como sociu de la SGAE". Xune apunta como exemplu que nengún otru miembru de "Dixebra" socios tamién de la SGAE pudieron votar. Llegaos a esti puntu Xune Elipe diz que "cree mui poco probable que'l cantar de Manolo Morán saliera como'l que más votos recibiera, yá que tenía que competir con artistes de munchu más reconocimientu, polo que m'estraña muncho'l resultáu final que llevó a formar el tríu finalista".

En resumen Xune Elipe Raposo quéxase d'un procesu poco tresparente nel que paecen albidráse movimientos estraños. El cantante de "Dixebra" púnxose en contactu cola SGAE pa pidir esplicaciones de como foi'l procesu pasu por pasu, pero a día de güei la SGAE sigue ensin contestar. P'acabar Xune considera que "hai que pidir responsabilidaes a la SGAE," y tamién" que'l resultáu d'esti añu foi un duru golpe pa la xente que tuvo pidiendo esti premiu a lo llargo de munchos años".

Nos próximos díes ufiertaremos dende Asturies.com más valoraciones d'esti polémicu premiu.