El cantar líricu n’asturianu amplía repertoriu gracies a Vicente J. Sánchez

|
Cubierta 'Canción lírica asturiana de conciertu' de Vicente J. Sánchez

Si va dos selmanes presentábase’l proyeutu de Carlos Rubiera ‘Lluna d’abril’, editáu pola Academia de la Llinga Asturiana, que buscaba ampliar el repertoriu de les corales asturianes, agora llega una propuesta nel mesmu sen pal cantar líricu. Ye ‘Canción lírica asturiana de conciertu’ (Trabe), de Vicente J. Sánchez, que va presentase esti vienres con un conciertu nel Conservatoriu Eduardo Martínez Torner.

La Conseyería de Cultura, Política Llingüística y Turismu entamó’l 22 de setiembre un conciertu pa presentar la iniciativa de Rubiera, dientro de les actividaes Seronda Musical, y agora fai lo propio pa espardir la idea de Sánchez, amás de collaborar cola edición del llibru. Son 20 cantares asturianos pa ser interpretaos por cantante solista acompañáu al pianu, de los que 16 son melodíes de creación nueva (cantar d’autor), 2 son melodíes recuperaes por Eduardo Martínez Torner y les otres 2 populares asturianes.

“‘Canción lírica asturiana de conciertu’ quier ayudar a ampliar l’acervu del repertoriu clásicu n’asturianu pa que les carreres d’intérpretes de cantar asturianu en cualquiera de les sos modalidaes nun lleguen a estancase prematuramente pola escasez de repertoriu. Les composiciones nueves pueden ayudar a progresar técnicamente y a evitar la falta de motivación que produz la escesiva repetición de los mesmos cantares”, espliquen dende la conseyería.

El llibru inspírase nos cancioneros de la dómina del lied asturianu (1885-1935), dende Baldomero Fernández a Manuel del Fresno. Y, nesa llinia, “pon a disposición de la sociedá asturiana cantares líricos nuevos acompañaos basaos en lletres escrites por poetes asturianos”.

Xira per Asturies

La presentación del llibru y los cantares va tener llugar esta tarde, a les 19 hores con entrada llibre hasta completar aforu, nel Conservatoriu Superior Eduardo Martínez Torner d’Uviéu con un recital cola presencia del autor y l'actuación d'Eliana Sánchez (declamación), Beatriz Díaz (sopranu) y Mario Bernardo (pianu). Al actu va acudir tamién Antón García, direutor xeneral de Política Llingüístca.

L’espectáculu va poder vese próximamente en Morea (28 d’ochobre), Llanes (4 de payares) y Mieres (3 d’avientu).

Contador Estadistiques