El bouzouki, l'instrumentu col qu’Elías García fixo “una música que trescendía”

|
Rubén Bada, Leticia Baselgas y Elías García

“Elías García tuvo tou un branu tocando la gaita na cai pa poder mercar el so primer bouzouki nuna tienda de Xixón”, rellata Rubén Bada, intérprete tamién d’esti instrumentu y compañeru del músicu nel dúu Bada y García. Non sólo se convertiría nun gran intérprete, sinón que fadría con él “una música que trescendía”.

El bouzouki, habitual nes formaciones folk atlántiques, trátase d’un instrumentru d’orixe griegu que nun s’incorporaría a esta escena hasta la segunda metá del sieglu pasáu. “Un músicu irlandés pidió a un collaciu que viaxó a Grecia un llaúd. Ésti confundióse y traxo-y un bouzouki, polo que se punxo a cavilar con él. La música tradicional irlandesa nun tenía acompañamientu, como l’asturiana, y vio que s’adaptaba mui bien”, esplica Bada.

“Permite tocalu con una afinación abierta o semiabierta, polo que se presta bien a tocar música modal, tradicional, non atemperada”, lo que lu convierte nun instrumentu “mui versátil”, dalgo que nun asocede, esplica’l cuerdista, cola guitarra española. Esta carauterística facilitó que se fixera popular ente los músicos irlandeses, que diben incorporando cambios adaptando l’instrumentu a les sos necesidaes, y que se volviera habitual en formaciones folk altántiques.

A Asturies llegaría de la mano de García, anque’l primeru que mercaría sería del tipu griegu. “Ye col qu’empezamos toos, col que salgo yo nes semeyes de Xéliba. Naquellos años facía pareya de gaita y tambor con Fonsu Mielgo y, según nos contaba, taba de ver bouzoukis a bandes de la época y quería facese col que teníen nuna tienda musical de Xixón. Tuvo tou un branu tocando la gaita pa poder mercalu y cuando terminó foi con una mochila con toles perres que recibiera, duros y inclusive y pesetes supongo, y púnxola enriba’l mostrador pa contales y llevalu”, rellata Bada.

Años más tarde, nuna época na que nun esistía Internet, algamaría un contautu inglés, Sobell, que s’encargaba d’ellaboralos y al qu’acudiríen tamién otros intérpretes, como Ígor Medio, músicu pol que Bada conocería’l bouzouki. “Foi nun Conciertu pola Oficialidá na plaza toros de Xixón, nel 92 o 93, viendo a Felpeyu. Nun sabía lo que yera y al acabar dirixíme a Ígor interesáu pol mesmu. Él abrió la funda y diómelu pa que lu tocara”, rellata.

Repercusión mundial

Col so bouzouki, García non sólo se convertiría nuna persona clave na evolución de la música tradicional asturiana, sinón que con Llan de Cubel y la so música trespasaría llendes. “Depués de conocese la noticia, llegáronme mensaxes de persones d’Escocia, Francia…, de tol mundu. Eso diz muncho del talentu y la visión musical que tenía. Elías, que, a parte de ser un gran instrumentista, fixo una música que trescendía”, asegura Bada.

“Nun acabamos de danos cuenta de la repercusión de too esto, de lo valoráu que taba García nel folk mundial”, sigue’l cuerdista, que llamenta que la so perda llegue “nun momentu especialmente prolíficu” del músicu. Asina, apunta que, amás del discu de Llan de Cubel yá grabáu, a piques de salir, “diba a retomar actividá con Felpeyu, tenía planes de grabar con Mapi Quintana y con Tuenda, tenía’l proyeutu conmigo, Bada y García… Nun sé si con Herbamora había dalgo en mente y acababa de collaborar con Fonte Fuécara”, numbera Bada, que considera que lo que-y quedaba a García por ufrinos, “nel peor de los casos, sería grandiosísimo”.

Na semeya, Bada y García, col so bouzouki, xunto a Leticia Baselgas.

Contador Estadistiques