El beisbol astur prepara la temporada

El beisbol americaniu tien n'Asturies a un garapiellu d'aficionaos que, organizaos alredor del club El Llano de Xixón, lleven unos cuantos años faciendo por promocionar y esparder esti deporte. Depués de munchu trabayu, l'equipu ta acabante de llegar a la División de Honor de béisbol, una competición estatal qu'entama'l 6 de Abril. Pa reforzase con vistes aesta temporada, l'equipu asturianu ta fichando xugadores de fuera, ente los que rescampla'l dominicanu Luis Alberto Pereyra, alias Cristian. Esti fichaxe estrella vien de la cantera de los célebres Yankees de Nueva York pa ser llanzador del equipu, pero tamién va collaborar entrenando a les categoríes inferiores del club y va da-yos preparación específico a los demás llanzadores del equipu. Otramiente, El Llano anda detrás d'un "short stop" o un catcher pa reforzar un equipu al que volvió va poco'l xixonés Belarmino Granda depués d'un añu en blanco por lesión.