El balón echa a rodar ensin públicu y con duldes nos equipos asturianos

El Sporting y l’Uviéu inauguren esta fin de selmana la temporada 2020-2021 de Segunda División, marcada pola crisis sanitaria pola pandemia de COVID-19 y pola ausencia de públicu nes grades. La situación actual ta marcando’l mercáu, al que los roxiblancos entovía nun acudieron y nel que los azules apuesten pola mocedá.

LaLiga, depués de poder finar la campaña anterior non ensin incidencies, nun quier parar la maquinaria y yá pon a rodar el balón ensin esperar a que la evolución de la pandemia permita abrir de nuevo los campos, anque sía con aforu reducíu. Les perres y la televisión manden.

Asina, a poques selmanes de que finara la competición oficial, y con partíos aplazos nes dos primeres xornaes, arranca la competición en Primera y en Segunda División. En Segunda División B y Tercera, categoríes non profesionales, va producise’l 18 d’ochobre.

El primer equipu asturianu n’estrenase va ser el Sporting esta tarde n’El Molinón (18.15 hores) cola debutante Unión Deportiva Logroñés, l’antiguu Varea que pretende cubrir el güecu del desapaecíu Club Deportivo Logroñés. La única cara nueva nel prau va tar nel bancu, yá que David Gallego afronta’l so proyeutu en Xixón ensin fichaxes.

La herencia de la xestión de Miguel Montes Torrecilla y la mengua d’ingresos pola crisis faen que Francisco Javier Vicente Rico, responsable nuevu de la estaya deportiva, nun pueda reforciar la plantiya ensin que se produzan salíes que nun lleguen. Asina, el Sporting va presentar la mesma cara que la campaña anterior, cola ausencia única de Damián Pérez y Murilo, xugador que finó la so cesión, además de Molinero, con un alcuerdu pa renovar nel momentu nel que’l club pueda axustar el gastu.

Ensin Berjón

N’Uviéu la situación ye bien distinta, yá que la fin de contratu de dellos futbolistes con fiches altes permitió que Francesc Arnau pudiera acudir al mercáu. Rescampla la baxa de Saúl Berjón, xugador clave nes campañes últimes y ún de los de más calidá de la categoría, col que nun hebo alcuerdu tres una ufierta a la baxa tres una temporada marcada polos problemes físicos del estremu.

Bárcenas tampoco nun sigue y otru xugador cedíu como Ortuño, el máximu goliador con 14 goles, torna al Albacete, mentes que Lunin regresa al Madrid y Luismi, al Valladolid. Acabaron contratu Ibra, que fichó pol Giresunspor de la Segunda División turca; Lolo, que va xugar nel San Fernando de Segunda División B, mesma categoría a la que va Alfonso Herrero (Marbella); y Champagne y Coris, ensin equipu.

Nel capítulu de refuercios Arnau apuesta por cesiones de futbolistes mozos, como’l delanteru Rafa Mújica (21 años), procedente del Leeds United tres xugar la pasada campaña nel UD Extremadura y el Villarreal B; el porteru brasileñu Gabriel Brazão (19 años), propiedá del Inter que yá tuvo a préstamu nel Albacete; l’estremu Cedric Teguía (18), del Atlético B; y el centrocampista Edgar González (23 años), del Betis. A ellos hai que sumar el fichaxe del porteru Joan Femenías (Fuenlabrada).

Estos cambios importantes na plantía del club uvieín, con salida de futbolistes con un pesu importante nel xuegu, convierten nuna incógnita’l nivel que pueda ufrir l’equipu, nel que sigue al frente Ziganda tres el bon final de campaña que firmó. La primer prueba va tener llugar mañana al meudía nel Carlos Tartiere nuevu, tamién ente un recién ascendíu, el Cartagena.

Col 4 d’ochobre como fecha afitada pa la fin del mercáu, les selmanes próximes van provocar munchos cambios en tolos equipos de la categoría, con únicos favoritos pa lluchar pol ascensu los trés descendíos y l’Almería. Clubes cola historia del Sporting y Uviéu tán obligaos a mirar hacia arriba, anque la igualdá estrema esistente en Segunda y la situación especial d’esta campaña recomienda nun perder de vista los puestos de peligru.