El 60 por cientu de la población diana yá recibió una dosis

Tien la pauta completa de vacunación un 37,13 por cientu de los mayores de 16 años. Esti martes rexistráronse 80 casos de COVID-19.

Un total de 544.024 persones recibieron n'Asturies polo menos una dosis de la vacuna, lo que significa un 60,36 por cientu de la población diana y un 53,40 por cientu de la total del país. El preparáu de Pfizer/BioNTech ye'l más alministráu, con un total de 353.055 puestes.

Coles dos dosis o cola monodosis de Janssen hai 334.591 asturianes y asturianos. Ye'l 37,13 por cientu del sector de la población a la que ta destinada la vacuna y el 32,84 por cientu del total.

Les persones que reciben una dosis yá cuenten con una alta inmunización, que se completa con una segunda alministración nel casu de la de Pfizer/BioNTech, AstraZeneca y Moderna. La vacunación sigue estos díes centrada sobre manera nel tramu d'edá de 40 a 49 años, a la que se destinen los viales de Pfizer/BioNTech, Moderna y Janssen, y ayeri algamóse la cantidá más alta de tola campaña, con 14.674 persones vacunaes nuna xornada.

Cuarta xornada ensin muertes

A falta de la espublización de los datos oficiales de la COVID-19, la Conseyería de Salú informó de 80 contaxos ayeri. Son 43 más que'l llunes, cuando se comunicaron 37.

Fixéronse 3.250 pruebes de diagnósticu d'infeición activa, polo que la tasa de positividá s'asitió nel 2,86 por cientu, pol 2,35 de la xornada anterior con 2.728 tests. A 7 díes esti porcentaxe yera enantes de l'actualización del 2,38 por cientu –ayeri xubió al 2,58 por cientu–.

Nun hebo que llamentar muerte nenguna per cuartu día, lo que permite que la serie total de finaos se caltenga en 1.974. El númberu d'hospitalizaos na UCI sigue en 31, mentes qu'en planta tán ingresaos 59 pacientes con confirmación o sospecha de COVID-19, 5 menos que'l llunes.

Na semeya, un ciudadanu menor de 50 años recibe la vacuna nel fondu norte d'El Molinón.