Selmana de les Lletres Asturianes

El 25 d’abril va celebrase la primer xornada de la VI Sestaferia del profesoráu d’asturianu y eonaviego

|

Los profesores de Llingua Asturiana y Gallego-asturiano de Primaria, Secundaria y Bachilleratu yá pueden matriculase pa la VI Sestaferia que va tener llugar el 25 d’abril en Xixón. Ésta va constar de charres y talleres enfocaos a les TIC.

El Centru del Profesoráu y de Recursos Cuenques Mineres entama esta actividá coordinada pol asesor téunicu docente d’Actualización Profesional del CPR, Lluis Gabriel Antuña, y José Luis Remis, de la Conseyería d’Educación, Cultura y Deporte. Ésta primer xornada de la Sestaferia, prevista pal 25 d’abril na Llaboral, tiene como oxetivos “conocer propuestes metodolóxiques que favorecen el trabayu de les competencies llingüístiques, tener una visión xeneral de los recursos TIC que puen usase p'ameyorar les competencies llingüístiques y prauticar con ferramientes TIC que puen aplicase nes clases de Llingua Asturiana y Gallego-asturiano”. Pa ello van desendolcase dos ponencies y trés talleres simultáneos polos que van dir rotando los maestros.

La inauguración de la Sestaferia va celebrase a les 9.15 hores tres la recoyida de documentación, que va principiar a les 9 hores, pa darréu dar pasu a la primer ponencia, de nome ‘Estratexes pa desenvolver la competencia llingüística’, protagonizada por Ana Basterra, asesora del Berritzeguneak Leioa. A les 11 hores va ser el turnu d’Alberto García, profesor del Centru Públicu d’Educación Básica de La Puela, que va falar de los ‘Recursos TIC pa trabayar competencies llingüístiques’. Tres les charres van principiar los talleres, d’hora y media de llargor, previstos pa les 13, 16.30 y 18 hores. Éstos van tar impartíos por Xulio Berros (‘Ferramientes TIC pal fomentu de la llectura), Pablo A. Quiroga (‘Ferramientes audiovisuales y TIC pa trabayar la espresión oral’) y Pablo Rodríguez Medina (‘Ferramientes TIC pa trabayar la espresión escrita’).

Les ponencies van tener como sede la sala 2 de la Llaboral, con entrada pel teatru, mentes que los talleres van desenvolvese nel Centru Integráu de Formación Profesional La Llaboral. Los maestros y maestres de Llingua Asturiana y Gallego-asturiano interesaos en participar pueden facelo hasta’l 22 d’abril al travies de la rede o remitiendo’l formulariu d’inscripción al CPR Cuenques Mineres, teniendo en cuenta que’l mínimu de places son 50 y el máximu, 120. La llista de persones almitíes va espublizase na sede del CPR y na so web el 23 d’abril, esto ye, dos díes enantes de la celebración d’esta Sestaferia, que va tener continuidá con una segunda xornada’l 25 de xunu. La prevista en branu pretender ser un espaciu de conocimientu d’esperiencies novedoses desarrollaes pol profesoráu nel aula y nos centros en xeneral.

Contador Estadistiques