El 1% cultural, pa la historia militar

El Ministeriu de Fomentu y el de cultura apautaron esti mes destinar la importante cantidá de 3,9 millones d'euros con cargu al 1% cultural a financiar el proyectu del Muséu de la Historia de la Industria Militar de Trubia. Anque'l Muséu ta entovía pendiente de proyectu museográficu, yá la primer vegada que se faló d'el díxose que diba valir pa dar a conocer la historia de la fábrica de Trubia y fomentar "la cultura de defensa".

El valle del Trubia foi ún de los primeros guaños de la industrialización n'Asturies, desarrollándose nelli l'actividá minera y siderúrxica a lo llargo de tol cursu del ríu dende los montes del conceyu de Quirós hasta la mesma Trubia, onde entovía esiste la fábrica d'armes, anguaño enxerta na multinacional General Dynamics y que foi nos sieglos XVIII y XIX ún de los centros punteros na técnica metalúrxica. Les tresformaciones sociales y económiques que truxo la industrialización a la comarca entovía tan ensin estudiar, y de fechu, nin siquiera ta catalogáu el patrimoniu industrial del valle, que tuvo nun tris de ser el pasu ferroviariu d'Asturies a la meseta, anque a la fin el mayor puxu del valle del Caudal llevó la conexón del tren hasta'l pasu del Payares.