Echa a andar el remonte nuevu de Payares

Depués d'un tiempu llargu d'obres, el remonte nuevu de la estación d'esquí de Payares va echar a andar mañana. El telesilla, con capaxidá pa cuatro persones, va valer p'aprovechar en condiciones la capacidá de les pistes del Valle'l Sol y los cañones nuevos de ñeve artificial, carretando a 1.500 persones a la hora contra les 500 del telesquí que vien a sustituyir, y fai el trayectu de 926 mts en 6 minutos, muncho más rápido qu'enantes. La infraestructura, qu'echa a andar yá cola temporada amediada, costó 1,4 millones d'euros, y tenía que tar abierta yá, pero la obra, que se fizo col inviernu yá metíu, tuvo de parase delles vegaes por culpa del tiempu. En rellación a esti asuntu, dende la Dirección Xeneral de Deportes dicen tamién que la temporada d'esquí ye un ésitu dende'l puntu de vista del aniciu a esti deporte, y ye que, según datos oficiales, más de 1.000 escolinos asturianos de más de trenta escueles distintes participaron yá nos programes de la Conseyería de "Selmana Blanca", quedando entovía places llibres pa pidir, lo que va facer d'esti añu el meyor dende que'l Principáu entamó a dar esta actividá estraescolar.