Duro Felguera nun asegura’l pagu de los salarios de payares a los sos emplegaos

La delicada situación de Duro Felguera, agravada pola querella que la Fiscalía Anticorrupción presentó ente la ‘Audiencia Nacional’ por supuestos pagos de comisiones y sobornos en Venezuela, fai peligrar los sueldos de los sos emplegaos. El so presidente, Ángel Antonio del Valle, nun garantiza que se pueda pagar en payares.

Asina lo treslladó nuna reunión con Jenaro Martínez y Damián Manzano, secretarios xenerales de MCA-UXT y CC OO Industria, de manera respeutiva. D’esta forma, la empresa namái asegura que pueda pagar los sueldos de setiembre y ochobre a los sos 2.000 emplegaos.

La falta d’un inversor y la imposibilidá de poder facer frente a les sos obligaciones financieres dexen a Duro Felguera nuna situación más que delicada, pese a que los bancos decidieron ayeri un alcuerdu nuevu de suspensión de cobru por cuatro meses más. A ello hai que sumar la querella presentada ente la ‘Audiencia Nacional’ por supuestos pagos de comisiones, hasta los 89 millones d’euros, de direutivos de la empresa –ente ellos Del Valle y l’ex presidente Juan Carlos Torres Inclán– a autoridaes venezolanes pa la construcción d’un ciclu combináu nel país sudamericanu.

Esta denuncia, que ta a la espera de ser almitida a trámite, provocó un desplome de les aiciones de la compañía en bolsa. Asina, ayeri baxaron un 11,5 por cientu el so preciu, a lo qu’hai que sumar una cayida adicional esta mañana del 7,4 por cientu, reduciendo’l valor del mercáu de Duro Felguera a los 80 millones d’euros.