Duro Felguera en perdes

La compañía asturiana de bienes d´equipu algamó un resultáu negativu de 326.000 euros nel primer semestre d´esti añu. Permalos resultaos de Duro Felguera nel entamu d´esti añu: baxada de la facturación d´un 11,12%, un 16,13% de cayida nel resultáu netu d´esplotación , una cayida del 52,31% del beneficiu brutu d´esplotación, un negativu resultáu d´actividaes ordinaries de 250.000 euros, y sobremanera'l pasu de ganar 2,91 millones d´euros nel primer semestre del añu 2002, a tener perdes esti añu penriba los 300.000 euros.

La mala traza de los resultaos de Duro Felguera tan emburriaos pola mala situación de la empresa en México, onde tien deudes que nun-y paguen, amás tamién señalen como causa la cayida del dólar ante´l euru. Ensin dulda foi clave la desaceleración de les economíes cola baxada de demanda nos productos siderúrxicos y de bienes industriales. Duro Felguera comunicó ayeri estos permalos resultaos a la Comisión Nacional del Mercáu de Valores (CNMV). La direición de la compañía asturiana tien enfotu en garrar nuevos contratos industriales col oxetivu de superar les preocupantes perspectives de la empresa.

Torna otra vegada más les alcordances de l´ablucante crisis de Duro Felguera nos años 90 cuando les perdes millonaries añu tres añu marcáben los balances de la empresa. El casu ye que mentanto Duro Felguera nun se xunte con un sociu tecnolóxicu potente y rentabilice les sos inversiones, el futuru de la empresa asturiana nun ye mui bonu. Nel fondu la cuestión tá la llimitada competitividá de la compañía nos mercaos internacionales pola probetaya política d´innovación, investigación y desarrollu. De fechu l´apueste poles nueves tecnoloxíes y la investigación son l´asignatura ensin aprebar de les empreses del país.