Duerna va presentar el vienres en La Felguera’l ‘¡¡¡A mansalva!!!’, el so segundu trabayu d'estudiu

El 28 de mayu pasáu, Duerna convirtióse en ganador del VI Concursu Escenariu Prau, que tenía como premiu la grabación d’un discu esti mesmu añu. El trabayu yá ye una realidá y va presentase con un conciertu especial en La Felguera.
 
‘¡¡¡A mansalva!!!’ ye’l nome d’esti álbum, el segundu na carrera de la banda de la cuenca del Nalón y el segundu qu’edita esti añu tres la espublización de ‘Manca la maera’en xunu. El discu ye parte del premiu del prestixosu concursu de música folk qu’entama l’Asociación Cántabra de Festivales Prau y foi grabáu nel mes de setiembre nos Tutu Estudios cola collaboración de Pablo Dalama (saxo), Rafa Puente (trompa), Xan Panpim (acordión), Edelmiro Fernández (gaita gallega), Fernando Vázquez (bombarda), Marcos García (acordión diatónica), Jorge Ibáñez (guitarra y bouzouki), Orestes Barbachán (congas y bongos), Sergio Rodríguez (baxu) y les bandes de gaites Conceyu Llangréu y Conceyu Siero. Mentes, Ruma Barbero encargóse de los dibuxos y la maquetación.
 
En total son diez cantares que muestren una evolución na formación pese al pocu tiempu trescurríu ente ‘¡¡¡A mansalva!!!’ y el trabayu anterior. Duerna, xunto col músicu Dani Álvarez, coproductor y arreglista, consiguen mantener l’estilu carauterísticu del grupu, reiventando armoníes y melodíes que la banda nun esperimentara enantes. Tres presentar el trabayu na sala Black Bird de Santander el 24 de payares pasáu, José Martínez, Estefanía Moro, Pablo Carrera, Pedro Pablo Iglesias, Andrés Martínez y Dani van dar a conocer esti discu nuevu a los sos paisanos nun conciertu que va tener llugar nel Teatru Nuevu de La Felguera esti vienres a partir de les 20 hores.
 
Pa esta cita especial, Duerna nun va tar solu, yá que ta prevista la presencia nel escenario llangreanu de les bandes de gaites Conceyu Llangréu y Conceyu Siero, amás del Coro Padre Coll y Tomás Fernández (saxo), Rubén Menéndez (trompeta), Orestes Barbachán, Tante Blanco (guitarra llétrica), Marisa Valle Roso (voz), Reija de Llangréu y Joaquín y Cintya (tangu). El preciu de la entrada ya de 3 euros y ésta pue mercase nel propiu teatru los díes de función, na Casa de Cultura de Sama y nos caxeros Tiquexpress de Caxastur.