Dragados va facer la obra de El Musel

La mayor obra pública de la historia d'Asturies yá ta alxudicada. La unión temporal d'empreses qu'encabeza Dragados y na que participen Alvargonzález Contratas, SATO y FCC va facer l'ampliación del Puertu de El Musel en Xixón por importe de 580 millones d'euros. La primer piedra pa la obra va ponese en febreru y la obra tien de tar entregada en 46 meses de plazu, dos meses menos de los cuatro años previstos. En cualquier casu, trátase de conocíos de vieyo de l'alministración portuaria, en cuantes que SATO tien en El Musel dos obres alxudicaes, como son l'enanchamientu del muelle de Marcelino León y d'otra la carretera ente Aboño y El Musel, ramal sobre'l que seguramente va construyise la futura autovía de la "ronda oeste" D'otra parte, Dragados fizo la obra del edificiu d'usos múltiples del puertu, que ta pa inaugurar. Alvargonzález Contratas, sociu asturianu de la UTE, fizo obra nel muelle de La Osa xunta FCC.

La propuesta de Dragados, el grupu representáu por Florentino Pérez, consiguió la mayor puntuación posible en concursu como propuesta técnicamente más afayadiza, emponderando l'autoridá portuaria tanto la rapidez nel plazu d'entrega como'l fechu de que la constructora cuenta con emplegar intensivamente les canteres más allegaes al puertu, colo que va amenorgase'l trasiegu de camiones carretando material pal rellenu de los cais y espigones

Anque'l puertu que se va construyir ye una alternativa menguada sobre'l Muselón que propunxere nel so día Francisco Álvarez Cascos, los datos de la obra conviértenla na mayor de la historia d'Asturies, dexando pequeña la construcción d'Ensidesa n'Avilés. El puertu nuevu va doblar en tamañu al esistente agora, creando cerca de 4 kilómetros de llinia d'atraque nos que puen entrar al mesmu tiempu hasta trés barcos de 325 metros d'eslora y 230.000 tonelaes, y ganándo-y a la mar más de 140 hectarees de suelu. 274 millones d'euros de los fondos de cohexón de la UE y un créditu por importe d'otros 250 al Bancu Européu de Inversiones garanticen la financiación de la obra. Les gananciesmedies de El Musel, que foron nel añu 2003 de 7,8 millones d'euros, aseguren el pagu del créditu.

Más información y tolos enllaces na web de l'Autoridá Portuaria