Dos oros pal Judo Club Avilés en Canarias na Copa d'España sub-15

|
Judo Club Avilés en Copa d'España sub-15

Raquel Burgos ganó en -52 kgs y Javier Simancas en -42 al superar al so hermanu Álvaro na final. L'equipu algamó otros 2 metales más na competición celebrada en Granadilla.

Magar que la representación na Copa d'España de yudu que tuvo llugar na final de selmana del 19 na población tinerfeña viose mermada por causa del andanciu, yá inclusive dellos miembros del equipu asturianu nun pudieron volar al nun pasar el cribáu de la PCR previa al viaxe, la espedición del Judo Club Avilés comandada por Carlos Fernández, entrenador del equipu, collechó un ésitu bultable. Los avilesinos volvieron p’Asturies con cincu medayes nel pescuezu: dos oros, dos plates y un bronce.

Ganaron la competición Burgos, na categoría de -52 kgs, y Javier Simancas en -42 protagonizando una final asturiana dafechu xunto col so hermanu Álvaro, que quedó cola plata. Mesmu metal llevó Nel Suárez en -60, que tuvo a piques de llevar l'oru nún combate llargu non sin della polémica en cuantes a la decisión final de mesa y xuez.

Marcos Menéndez, pela so parte, zarró’l medayeru con un bronce en -42 kgs. L’equipu avilesín, que saliera’l xueves rumbu a Tenerife Sur, regresó a Asturies na tarde del llunes tres una fin de selmana nel que nadie nun foi quien a apealos del podiu.

Repartu de 2,7 millones d'euros cola Llotería de Navidá

La bona selmana del Judo Club Avilés no deportivo completóse col segundu premiu na Llotería de Navidá gracies al 89.109, ún de los quintos premios. En concreto repartió 2,7 millones d'euros en participaciones de 5 euros, mui distribuyíes tanto n'Avilés como en muchos llugares del Estáu por mor del habitual repartu de llotería ente clubes, padres y deportistes nes diferentes competiciones celebraes estos meses.

 

Contador Estadistiques