Dos importantes bandes asturianes preparen discos nuevos

"Llan de Cubel" y "N'Arba" tan trabayando pa espublizar nuevos trabayos discográficos.

Munchos son los aficionaos a la música folk asturiano que vienen dende va muncho demándando-yos a estes dos bandes que saquen un discu nuevu. Nel casu de "Llan de Cubel" va pa cuatro años qu'espublizaron el so "Tiempu Meyor" que foi el quintu discu del grupu folk asturianu con más proyección internacional. Munchos conciertos y xires per distintos países foron retrasando adulces la grabación d'un nuevu discu, y pel camín quedó'l proyectu de sacar un discu en directo, pero agora la banda ta en procesu d'escoyeta de cantares pa entrar a grabar na primavera de 2004 un trabayu nuevu d'estudiu. Nun hai nenguna fecha concreta pal llanzamientu, pero según comentaron a Asturies.com miembros del grupu, lo más fácil ye que pal añu qu'entra vaya haber discu nuevu de "Llan de Cubel".

Nun casu asemeyáu ta "N'Arba". Depués de grabar un discu compartíu en 1998 con "Folkgando", a últimos de 2001 sacaron a la cai "Inda ya ceu", primer discu en solitario que'l públicu asturianu recibió enforma bien. Dempués llegaron milenta actuaciones peles nueches celtes asturianes y un viaxe al Festival Intercélticu de Lorient qu'escosaron el directu del grupu, faltu d'un remocique. Dempués de tantos conciertos los siguidores de "N'Arba" piden cantares nuevos y paez que pal añu qu'entra va habelos. La banda yá ta preparándose pa grabar esta primavera, anque como nel casu de "Llan de Cubel", inda nun hai nenguna fecha apautada.