Domótica y máquines de retratar dixitales nel SIMO

El SIMO, la primer feria del Estáu d'informática y les nueves tecnoloxíes celébrase del 4 al 9 de payares nel Parque Ferial Xuan Carlos I en Madrid. SIMO, la feria de lo multimedia y lo dixital, tien acutaos cerca de 60.000 metros cuadradaos pa 565 espositores, unes dimensiones qu'obligaron a la organización a estremala n'estayes temátiques que traten sobre Tecnoloxíes de la Información, E-business y Internet, Aplicaciones Profesionales, Telecomunicaciones, Domótica, Electrónica de Consumu y Fotografía Dixital. Les grandes estrelles d´esta edición van ser ensin dulda la fotografía dixital y la domótica. De fechu estes dos secciones van tener más espaciu y más espositores que otros años.

En cuantes a la fotografía dixital, esti añu 2.003 foi el primer añu en que se vendieron más máquines de retratar dixitales qu'analóxiques, y la tendencia al alza d'esti mercáu tien tola traza de siguir pal 2.004 cola llegada a los ecaparates de les tiendes de modelos de meyores prestaciones y más baratos. Asina, la casa Canon ta acabante de presentar el primer modelu de reflex dixital con lentes intercambiables que sal con un preciu competitivu, 1.000 euros contra los 3.000 que cuesten los modelos de la competencia.

Otramiente, la domótica asiéntase na feria, onde va poder vese una casa entera colos últimos avances en cases intelexentes, casu de la dixitalización y interconexón de los electrodomésticos, la introducción de la voz nel control de la casa o la invasión de pantalles táctiles pa la programación de dellos aparatos.

Pa la polémica nel SIMO queda'l puestu del carísimu y, hasta agora probe de resultaos, plan estatal de la sociedá de la información Red.es qu'empobina'l Ministeriu de Ciencia y Tecnoloxía del Estáu Español, y pa los asturianos que visiten el ferial va quedar, de xuro, una sensación de "deja vu" col ambiente de la Feria de Muestres de Xixón… solo que d'alta tecnoloxía.