Docentes alerten de que, un añu más, llega tarde a les escueles la campaña de matriculación a Llingua Asturiana

|
Campaña 'Ye nuestra, ye pa ti' matriculación Llingua Asturiana 2022-2023

Iniciativa pol Asturianu recordó al entamu de la campaña p’animar a la matriculación na materia de Llingua Asturiana y d’Eonaviego de la necesidá de qu’ésta llegara a tiempu a los centros educativos pa que fora efeutiva. Un mes depués, col cursu finando, nun aportó a les escueles, según confirmaron docentes a la organización.

El periodu de matriculación en Primaria arranca’l miércoles y allárgase hasta’l martes viniente, mentes qu’en Secundaria y Bachilleratu va del 5 al 14 de xunetu, pero la realidá ye que la mayor parte de los alumnos y families yá fixeron los trámites pa la inscripción nes optatives pal cursu qu’entra. Mientres, ayeri llegó la campaña ‘Ye nuestra, ye pa ti / É nosa, é pra ti’ nel so formatu dixital al corréu de los maestros, y entovía nun se recibió la de papel nos centros.

“Esta situación vien repitiéndose nos últimos años y ye especialmente grave cuando les condiciones del contratu fechu pola Conseyería de Cultura y Política Llingüística pa esta campaña esixíen la llegada de los materiales a los centros enantes del 7 de xunu”, denuncia Iniciativa pol Asturianu, qu’apunta que “si la optatividá del idioma s’alcuentra nuna situación complicada al competir con otros idiomes y otres asignatures, esta situación vuélvese entá peor cola tardanza na promoción de l’asignatura, a la qu'obliga la Llei d'Usu y l'Estatutu d'Autonomía”.

Dada la circunstancia, empondera’l llabor del profesoráu de la materia “que cada añu entama les sos propies campañes de difusión de l'asignatura nos centros, cubriendo la falta de cumplimientu de les obligaciones del Gobiernu d'Asturies na promoción de l'asignatura”.

La promoción arrancó’l 17 de mayu

La campaña nueva ‘Ye nuestra, ye pa ti / É nosa, é pra ti’ arrancó’l 17 de mayu cola emisión de les siete pieces, realizaes por José Antonio Braña, na televisión y na radio públiques, que se va caltener hasta’l 15 de xunetu. Cinco son n’asturianu y dos en gallego-asturiano y en caúna d'nelles preséntense trés intervenciones d’alumnes y alumnos, families, profesoráu o persones que cursaron estes asignatures na so etapa escolar y respuenden a entrugues como “¿Por qué escoyéis Llingua Asturiana / Eonaviego? (families); ¿Por qué te presta aprender Llingua Asturiana / Eonaviego? (alumnáu); ¿Qué-yos aporta a los neños y neñes l’asignatura de Llingua Asturiana / Eonaviego? (profesoráu); y ¿Qué t’aportó Llingua Asturiana / Eonaviego na ESO y el Bachiller?”.

Tamién se dispón d’una páxina web onde poder ver toles pieces audiovisuales y consultar tola información sobre la materia de Llingua Asturiana y Eonaviego.

Contador Estadistiques