Doce compañíes emerxentes participen en Madrid na South Summit

La delegación asturiana encabezada pol Centru Européu d’Empreses y Innovación (CEEI) y Asturex cuenta con puestu propiu.

Col lema 'Innovation is business', el South Summit quier amosar a los entamadores los nichos de negociu qu’ufierta’l mercáu actual. Pa eso, céntrase n’aspeutos como’l financiamientu y la teunoloxía, la industria 4.0, el comerciu electrónicu, la ciberseguranza, la cadena de bloques, la salú y la intelixencia artificial.

Con 12.000 asistentes previstos ente güei y el vienres, la feria yá algamó esti añu’l récor d’empreses interesaes en participar, con 3.500 solicitúes de 70 países, lo que lo demuestra que se convirtió nuna de les cites más relevantes a nivel internacional pa potenciar l’ecosistema entamador. Ente los convidaos destaquen, ente otros, el fundador de Jazztel, Martín Varsavsky; el responsable d’inversiones de Beringea, Karen McCormick; y el primer executivu de Made, Philippe Chainieux.

Les empreses asturianes que participen cola delegación asturiana nel South Summit son Trekkapp, Moonwater, Sunthalpy Engineering, Pixelshub, Hoopoe Running Apparel, Sibox, I4Life, Abaco, I-Sen, OKticket, Xteach y Virtual Intelligence. Toles firmes van poder amosar mientres estos trés díes a los inversores estranxeros los sos proyeutos y tomar contautu con delles iniciatives que van ayudales a ameyorar la so competitividá al traviés de la innovación.