Dixebra y Asturies uníes por una historia común

Na mañana d'ayeri presentóse "Dixebra Cróniques d'un Pueblu", un discu-llibru que ye un repás a la historia de "Dixebra" y Asturies estos últimos quince años.

Escritu por Francisco Álvarez, "Dixebra Cróniques d'un Pueblu" ye un proyectu que lleva cociéndose más de dos años. El grupu propunxo al escritor facer un llibru sobre la historia del grupu, pero contando más bien les coses que pasen alredor del grupu, les coses que pasen n'Asturies y que tantu tiempu lleven cantando "Dixebra".Una historia paralela contada por Francisco Álvarez, que nos recuerda histories cotidianes del grupu, fechos importantes na so carrera musical, pero siempre mirando pa un país que da abondo sobre lo que cantar.

El discu resume, o intentalo, la evolución na música y nes lletres de la banda. Son nin más nin menos que 19 cantares nos que podemos topar dende lo más vieyo hasta temes del últimu discu. Pero nun ye un encontu de cantares de discos ensin más, cinco temes grabáronse de nuevo como por exemplu "Skandalera" o "Pallabres vieyes", qu'actualizáronse al soníu d'aguaño de "Dixebra". Otres cinco retocáronse metiendo vientos, metiendo una gaita o cantándola de nuevo, como "Baila'l Mileniu" o "La Danza". Amás nel discu ta "Asturalia", que nun taba en nengún discu de la discografía del grupu. Pel medio los cantares hai unos samplers pa da-y continuidá al cd, neses "cuñes" hai situaciones cómiques en entrevistes al grupu, comentarios de miembros de la banda o hasta un cachu d'un discursu de Xosé Lluis García Arias.

Pa completar el cd hai una pista que contién l'únicu videu musical de la banda, "Nun llores". Nesi videu fecho por Javier Lueje, Pelayo Duarte y Javi Martínez podemos ver les úniques imáxenes dende dientro de la catedral del encierru de los trabayadores de Duro Felguera allá pel añu 1997 que túvolos ellí na catedral d'Uviéu 318 díes.

Esti discu-llibru ye una pieza fundamental pa cualesquier siguidor o siguidora de "Dixebra", y qu'amás sal al mercáu al preciu d'un cd normal.