Dixebra asoleya un discu especial pa celebrar los sos 25 años de vida

No musical, el CD –con un diseñu paecíu al d’un vinilu– fai un repás a la trayeutoria del grupu nestos 25 años al traviés de versiones, remezcles o cantares con arreglos y lletres nueves como ‘Nun puxa’, versión de los Sex Pistols que yá sonara nel ‘Asturies o trabayes’, segundu álbum de Dixebra. Ente les versiones destaca ún de los temes que más recuerden los dixebriegos más vieyos y qu’hai tiempu que Dixebra nun toca en direutu, como ‘Merucu xusticieru’, y otros clásicos de la banda como ‘Canciu d’amor’, ‘Queda la rabia’, ‘Xuacu xinta xorra’, ‘Vaqueira’, ‘Dacuando’ o ‘Si vienes’. Mentes, tamién pue atopase nel CD remezcles de temes como ‘Pal Caribe’ o ‘Wilma Loulé’ pa sumar un total de 20 cortes que se grabaron nos Tutu Estudios baxo la producción de Sergio Rodríguez.

 

Pa esti trabayu, Dixebra quixo arrodiase d’ex compañeros de banda, collacios y músicos de renome, polo que son numberoses les collaboraciones. Asina, na nómina d’artistes que participen en ‘Dixebra XXV. 1987-2012’ atopamos a Israel Sánchez (El Sueño de Morfeo), Rubén Bada, Pablo Carrera (Duerna). Lisardo Prieto (Felpeyu), José Manuel Tejedor, Daniel Álvarez (Corquiéu) o Miguel Herrero, ente otros. El discu, que pue mercase xunto a una camiseta conmemorativa del aniversariu, destaca por ser la primer producción de L’Aguañaz como división musical de Goxe Producciones tres la so salida de Publicaciones Ámbitu, “colo que recupera la so identidá y personalidá propia y entama un llabor que quier valir d’encontu a la música asturiana contemporánea”, asegura Xune Elipe, cantante de Dixebra y responsable de la discográfica.